ದಂಡದಿಂದ ಪಾರಾಗಲು ಜೇಮ್ಸ್ ಬಾಂಡ್ ಶೈಲಿಯಲ್ಲಿ ಬಟನ್‌ ಒತ್ತಿ ಕಾರಿನ ನಂಬರ್‌ ಬದಲಿಸುತ್ತಿದ್ದ ವೈದ್ಯ ; ಪೊಲೀಸರೇ ಶಾಕ್ !

ಹೈದರಾಬಾದ್: ಸಿನೆಮಾದಲ್ಲಿ ಜೇಮ್ಸ್ ಬಾಂಡ್ ತನ್ನ ಕಾರಿನ ನಂಬರ್ ಪ್ಲೇಟ್ ಅನ್ನು ಕ್ಷಣಾರ್ಧದಲ್ಲಿ ಬದಲಿಸುವುದನ್ನು ನೋಡಿರಬಹುದು. ಅದೇ ಮಾದರಿಯ ಘಟನೆಯೊಂದು ಹೈದರಾಬಾದ್‌ನಲ್ಲಿ ನಡೆದಿದ್ದು, ಕುಡಿದ ಮತ್ತಿನಲ್ಲಿದ್ದ ವೈದ್ಯನೊಬ್ಬ ತನ್ನ ಐಷಾರಾಮಿ ಬಿಎಂಡಬ್ಲ್ಯು (BMW) ಕಾರಿನ ನಂಬರ್ ಪ್ಲೇಟ್ ಅನ್ನು ಪೊಲೀಸರ ಮುಂದೆಯೇ ಬದಲಿಸಿ ಎಲ್ಲರನ್ನೂ ದಂಗಾಗಿಸಿದ್ದಾನೆ.

ಶನಿವಾರ ರಾತ್ರಿ ಹೈದರಾಬಾದ್‌ನ ಶ್ರೀಮಂತ ಪ್ರದೇಶವಾದ ಜುಬಿಲಿ ಹಿಲ್ಸ್‌ನಲ್ಲಿ ಪೊಲೀಸರು ವಾಡಿಕೆಯಂತೆ ವಾಹನ ತಪಾಸಣೆ ನಡೆಸುತ್ತಿದ್ದರು. ಈ ವೇಳೆ ಐಷಾರಾಮಿ ಬಿಎಂಡಬ್ಲ್ಯು ಕಾರಿನಲ್ಲಿ ಬಂದ ಗೌತಮ ರೆಡ್ಡಿ ಎಂಬ ವೈದ್ಯನನ್ನು ಪೊಲೀಸರು ತಡೆದಿದ್ದಾರೆ. ಪೊಲೀಸರು ಅವರನ್ನು ಬ್ರೀತ್ ಅನಲೈಸರ್ ಪರೀಕ್ಷೆಗೆ ಒಳಪಡಿಸಲು ಮುಂದಾದಾಗ, ಟ್ರಾಫಿಕ್ ದಂಡದಿಂದ ತಪ್ಪಿಸಿಕೊಳ್ಳಲು ಗೌತಮ ರೆಡ್ಡಿ ರಿಮೋಟ್ ಕಂಟ್ರೋಲ್ ಮೂಲಕ ಕಾರಿನ ನಂಬರ್ ಪ್ಲೇಟ್ ಅನ್ನು ಕ್ಷಣಾರ್ಧದಲ್ಲಿ ಬದಲಿಸಿದ್ದಾನೆ. ಇದನ್ನು ಕಂಡು ಪೊಲೀಸರು ಒಂದು ಕ್ಷಣ ಸ್ತಬ್ದರಾಗಿದ್ದಾರೆ.

ಜೇಮ್ಸ್‌ ಬಾಂಡ್ ಕಾರಿನಂತೆ ತಾಂತ್ರಿಕ ಸೆಟಪ್
ಜೇಮ್ಸ್ ಬಾಂಡ್ ಸಿನಿಮಾಗಳಾದ ಥಂಡರ್‌ಬಾಲ್, ಗೋಲ್ಡನ್ ಐ, ಕ್ಯಾಸಿನೊ ರಾಯಲ್, ಸ್ಕೈಫಾಲ್ ಸೇರಿದಂತೆ ಹಲವು ಚಿತ್ರಗಳಲ್ಲಿ ಬಳಸಲಾದ ಆಸ್ಟನ್ ಮಾರ್ಟಿನ್ ಕಾರಿನಂತೆಯೇ ಈ ಕಾರು ವಿನ್ಯಾಸಗೊಂಡಿತ್ತು. ಕಾರಿನಲ್ಲಿದ್ದ ಒಂದು ನಂಬರ್ ಪ್ಲೇಟ್ ತೆಲಂಗಾಣ ನೋಂದಣಿಯ ‘TS9FQ9999’ ಆಗಿದ್ದರೆ, ಮತ್ತೊಂದು ದೆಹಲಿ ನೋಂದಣಿಯ ‘DL6CM7097’ ಆಗಿತ್ತು.
ಬಟನ್ ಒತ್ತಿದ ಕೂಡಲೇ ನಂಬರ್ ಪ್ಲೇಟ್ ತಿರುಗುವ ವ್ಯವಸ್ಥೆಯನ್ನು ಕಾರಿನಲ್ಲಿ ಅಳವಡಿಸಲಾಗಿತ್ತು. ಇದು ಕಣ್ಗಾವಲು ಕ್ಯಾಮೆರಾಗಳ ದಿಕ್ಕುತಪ್ಪಿಸಲು ಮತ್ತು ಇ-ಚಲನ್‌ಗಳಿಂದ ಪಾರಾಗಲು ಮಾಡಿದ ಸಂಚು ಎಂದು ತಿಳಿದುಬಂದಿದೆ.

ಪೊಲೀಸರ ತನಿಖೆ
ತನಿಖೆಯ ವೇಳೆ ತೆಲಂಗಾಣದ ನಂಬರ್ ಪ್ಲೇಟ್ ಆರೋಪಿಗೆ ಸಂಬಂಧಿಸಿದ ಮತ್ತೊಂದು ವಾಹನಕ್ಕೆ ಸೇರಿದ್ದೆಂದು ತಿಳಿದುಬಂದಿದೆ. ಈ ಬಗ್ಗೆ ಮಾತನಾಡಿದ ಜುಬಿಲಿ ಹಿಲ್ಸ್ ಸಂಚಾರಿ ಪೊಲೀಸ್ ಇನ್ಸ್‌ಪೆಕ್ಟರ್ ಎನ್. ರವೀಂದರ ಅವರು, “ನಕಲಿ ನಂಬರ್ ಪ್ಲೇಟ್ ಬಳಸುವುದು ಹೊಸತಲ್ಲ, ಆದರೆ ಇಷ್ಟು ಸುಧಾರಿತ ತಂತ್ರಜ್ಞಾನ ಬಳಸಿರುವುದು ಅಪರೂಪ. ಇದು ಡಿಜಿಟಲ್ ಕಣ್ಗಾವಲನ್ನು ತಪ್ಪಿಸಲು ಮಾಡಿದ ವ್ಯವಸ್ಥಿತ ಪ್ರಯತ್ನ” ಎಂದು ಹೇಳಿದ್ದಾರೆ.
ಈ ಅಕ್ರಮ ತಾಂತ್ರಿಕ ಬದಲಾವಣೆಯನ್ನು ಖಾಸಗಿ ಕಾರ್ ಡೆಕೋರ್ ಯೂನಿಟ್‌ನಲ್ಲಿ ಮಾಡಿಸಿರುವ ಸಾಧ್ಯತೆಯಿದ್ದು, ಅಂತಹ ಸಂಸ್ಥೆಗಳ ವಿರುದ್ಧವೂ ಕಾನೂನು ಕ್ರಮ ಕೈಗೊಳ್ಳಲು ಪೊಲೀಸರು ಮುಂದಾಗಿದ್ದಾರೆ.

ಮದ್ಯದ ಅಮಲು
ವೈದ್ಯ ಗೌತಮ ರೆಡ್ಡಿ ಅವರ ರಕ್ತದಲ್ಲಿ ಮದ್ಯದ ಪ್ರಮಾಣ ಭೀಕರವಾಗಿತ್ತು. ಕಾನೂನುಬದ್ಧ ಮಿತಿ 30 mg ಇರಬೇಕಾದ ಕಡೆ ಇವರಲ್ಲಿ 137 mg ಕಂಡುಬಂದಿದೆ.
ಆರೋಪಿಯ ವಿರುದ್ಧ ವಂಚನೆ ಮತ್ತು ಸೋಗು ಹಾಕುವ (Impersonation) ವಿಭಾಗದ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಮದ್ಯಪಾನ ಮಾಡಿ ವಾಹನ ಚಾಲನೆ ಮಾಡಿದ್ದಕ್ಕಾಗಿ ಮೋಟಾರು ವಾಹನ ಕಾಯ್ದೆಯಡಿ ಕೇಸ್ ದಾಖಲಾಗಿದೆ.
ಆತನ ಬಿಎಂಡಬ್ಲ್ಯು ಕಾರನ್ನು ಪೊಲೀಸರು ವಶಪಡಿಸಿಕೊಂಡಿದ್ದು, ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.