ನವದೆಹಲಿ: ಭಾರತ ಹಾಗೂ ಪಾಕಿಸ್ತಾನದ ಗಡಿ ನಿಯಂತ್ರಣ ರೇಖೆಯ ಉದ್ದಕ್ಕೂ ನಡೆದ ‘ಆಪರೇಷನ್ ಸಿಂಧೂರ’ ಕಾರ್ಯಾಚರಣೆಯ ಸಂದರ್ಭದಲ್ಲಿ ಪಾಕಿಸ್ತಾನದ 100ಕ್ಕೂ ಹೆಚ್ಚು ಸೈನಿಕರು ಮತ್ತು 12 ವಿಮಾನಗಳು ನಾಶವಾಗಿವೆ ಎಂದು ಭಾರತೀಯ ಸೇನೆಯ ಮಿಲಿಟರಿ ಕಾರ್ಯಾಚರಣೆಗಳ ಮಹಾನಿರ್ದೇಶಕ ಲೆಫ್ಟಿನೆಂಟ್ ಜನರಲ್ ರಾಜೀವ ಘಾಯಿ ಮಂಗಳವಾರ ಬಹಿರಂಗಪಡಿಸಿದ್ದಾರೆ.
ಲೆಫ್ಟಿನೆಂಟ್ ಜನರಲ್ ಘಾಯಿ ಅವರು ಪಾಕಿಸ್ತಾನದ ಸೇನೆಯು ಮರಣೋತ್ತರವಾಗಿ ನೀಡಿರುವ ಪ್ರಶಸ್ತಿಗಳ ಪಟ್ಟಿಯನ್ನು ಉಲ್ಲೇಖಿಸಿದ್ದಾರೆ. ಇವು ಭಾರತದ ವಾಯುಪಡೆಯ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ಎ.ಪಿ. ಸಿಂಗ್ ಅವರು ಕೆಲವು ದಿನಗಳ ಹಿಂದೆ ನೀಡಿದ ವಿವರಗಳನ್ನೇ ಪ್ರತಿಧ್ವನಿಸುತ್ತಿವೆ.
ಲೆಫ್ಟಿನೆಂಟ್ ಜನರಲ್ ಘಾಯಿ ಅವರು, “ಕಳೆದ ತಿಂಗಳು ಆಗಸ್ಟ್ 14ರಂದು ಪಾಕಿಸ್ತಾನವು ಬಹುಶಃ ಅರಿವಿಲ್ಲದೆ ತಮ್ಮ ಪ್ರಶಸ್ತಿಗಳ ಪಟ್ಟಿಯನ್ನು ಹೊರಬಿಟ್ಟಿದೆ. ಅವರು ನೀಡಿರುವ ಮರಣೋತ್ತರ ಪ್ರಶಸ್ತಿಗಳ ಸಂಖ್ಯೆಯನ್ನು ನೋಡಿದಾಗ, ಎಲ್ಒಸಿಯಲ್ಲಿ ಪಾಕಿಸ್ತಾನದ ಸೈನಿಕರ ಸಾವು-ನೋವುಗಳು 100ಕ್ಕಿಂತ ಹೆಚ್ಚಿವೆ ಎಂದು ಈಗ ನಮಗೆ ತಿಳಿದುಬಂದಿದೆ,” ಎಂದು ವಿಶ್ವಸಂಸ್ಥೆಯ ಸೈನ್ಯ ಪೂರೈಕೆ ರಾಷ್ಟ್ರಗಳ ಮುಖ್ಯಸ್ಥರ ಸಮಾವೇಶದಲ್ಲಿ ಅವರು ತಿಳಿಸಿದರು.
ಮೇ 7-10ರ ನಡುವಿನ ಸಂಘರ್ಷದ ವಿವರ
ಮೇ 7 ರಿಂದ 10 ರ ನಡುವೆ ನಡೆದ ಸೇನಾ ಸಂಘರ್ಷದ ಕುರಿತು ಮಾಹಿತಿ ಹಂಚಿಕೊಂಡ ಲೆಫ್ಟಿನೆಂಟ್ ಜನರಲ್ ಘಾಯಿ, ಮೇ 7 ರಂದು ಭಾರತವು ಒಂಬತ್ತು ಭಯೋತ್ಪಾದಕ ನೆಲೆಗಳ ಮೇಲೆ ದಾಳಿ ಮಾಡಿದ ಕೂಡಲೇ ಪಾಕಿಸ್ತಾನವು ಗಡಿಯಾಚೆಯಿಂದ ಗುಂಡಿನ ದಾಳಿಗೆ ಮುಂದಾಯಿತು ಎಂದರು.
“ನಾವು ಭಯೋತ್ಪಾದಕರನ್ನು ಗುರಿಯಾಗಿಸಿಕೊಂಡು ದಾಳಿ ಮಾಡಿದೆವು. ನಮ್ಮ ಉದ್ದೇಶ ಈಡೇರಿದ ನಂತರ, ಪರಿಸ್ಥಿತಿ ತೀರಾ ಹದಗೆಡದ ಹೊರತು ಅದನ್ನು ಉಲ್ಬಣಗೊಳಿಸುವ ಉದ್ದೇಶ ನಮಗಿರಲಿಲ್ಲ. ಭಯೋತ್ಪಾದಕ ನೆಲೆಗಳ ಮೇಲೆ ದಾಳಿ ಮಾಡಿದ ಕೂಡಲೇ ಪಾಕಿಸ್ತಾನವು ಗಡಿಯಾಚೆಯಿಂದ ಗುಂಡಿನ ದಾಳಿಯನ್ನು ನಡೆಸಿತು” ಎಂದು ಅವರು ಹೇಳಿದರು.
ಪಾಕಿಸ್ತಾನವು ಸಂಘರ್ಷವನ್ನು ಮುಂದುವರೆಸಿದ್ದರೆ, ಭಾರತೀಯ ನೌಕಾಪಡೆಯು ಕೂಡ ಸಮುದ್ರದ ಮೂಲಕ ಮತ್ತು ಇತರ ಆಯಾಮಗಳಿಂದ ವಿನಾಶಕಾರಿ ಪ್ರತಿಕ್ರಿಯೆ ನೀಡಲು ಸಂಪೂರ್ಣವಾಗಿ ಸಿದ್ಧವಾಗಿತ್ತು ಎಂದು ಡಿಜಿಎಂಒ ತಿಳಿಸಿದರು.
ಪಾಕ್ನ ಡ್ರೋನ್ ದಾಳಿಗಳು ಸಂಪೂರ್ಣ ವಿಫಲ
ಆಪರೇಷನ್ ಸಿಂಧೂರ ಕುರಿತು ವಿವರ ನೀಡಿದ ಲೆಫ್ಟಿನೆಂಟ್ ಜನರಲ್ ಘಾಯಿ, ಭಾರತದ ವಿರುದ್ಧ ಪಾಕಿಸ್ತಾನ ನಡೆಸಿದ ಡ್ರೋನ್ ದಾಳಿಗಳು “ಸಂಪೂರ್ಣ ವಿಫಲ” ವಾಗಿವೆ. ಭಾರತ ಹಾಗೂ ಪಾಕಿಸ್ತಾನದ ಡಿಜಿಎಂಒಗಳು ಮಾತುಕತೆ ನಡೆಸಿದ ನಂತರವೂ ಪಾಕಿಸ್ತಾನ ಡ್ರೋನ್ ದಾಳಿಗಳನ್ನು ಮುಂದುವರೆಸಿತ್ತು.
“ನಮ್ಮ ಸೈನಿಕರಿಗೆ ಮತ್ತು ಯುದ್ಧ ಸಾಮಗ್ರಿಗಳಿಗೆ ಹಾನಿ ಉಂಟುಮಾಡುವ ಪ್ರಯತ್ನದಲ್ಲಿ ವಿವಿಧ ಮಾದರಿಯ ಡ್ರೋನ್ಗಳನ್ನು ಬಳಸಲಾಯಿತು. ಆದರೆ ಎಲ್ಲವೂ ಸಂಪೂರ್ಣ ವೈಫಲ್ಯ ಕಂಡವು ಎಂದರು.
ಈ ದಾಳಿಗಳ ಪರಿಣಾಮವಾಗಿ ಭಾರತೀಯ ವಾಯುಪಡೆಯು ಮೇ 9 ಮತ್ತು 10 ರ ಮಧ್ಯರಾತ್ರಿ ಪಾಕಿಸ್ತಾನದ ನೆಲೆಗಳ ಮೇಲೆ ನಿಖರವಾದ ದಾಳಿಗಳನ್ನು ನಡೆಸಿತು. ನಾವು ಅವರ 11 ವಾಯುನೆಲೆಗಳ ಮೇಲೆ ದಾಳಿ ಮಾಡಿದೆವು. 8 ವಾಯುನೆಲೆಗಳು, 3 ಹ್ಯಾಂಗರ್ಗಳು ಮತ್ತು 4 ರಾಡಾರ್ಗಳು ಹಾನಿಗೊಳಗಾದವು. ವಾಯುನೆಲೆಗಳಲ್ಲಿ ನಿಲ್ಲಿಸಿದ್ದ ಪಾಕಿಸ್ತಾನದ ವೈಮಾನಿಕ ಸಂಪತ್ತು ಕೂಡ ನಾಶವಾಯಿತು,” ಎಂದು ಡಿಜಿಎಂಒ ವಿವರಿಸಿದರು.
ಪಾಕಿಸ್ತಾನದ ಭೂ ಮತ್ತು ವಾಯುಪಡೆಯ ನಷ್ಟದ ವಿವರಗಳು:
ಒಂದು ಸಿ-130 ದರ್ಜೆಯ ವಿಮಾನ.
ಒಂದು ಎಇಡಬ್ಲ್ಯೂ&ಸಿ (ವಾಯುಗಾಮಿ ಮುಂಚೂಣಿ ಎಚ್ಚರಿಕೆ ಮತ್ತು ನಿಯಂತ್ರಣ) ವಿಮಾನ.
ನಾಲ್ಕರಿಂದ ಐದು ಫೈಟರ್ ಜೆಟ್ಗಳು.
ವಾಯುಮಾರ್ಗದಲ್ಲಿ 300 ಕಿ.ಮೀ.ಗಿಂತಲೂ ಹೆಚ್ಚಿನ ದೂರದಿಂದ ಹೊಡೆಯಲಾದ 5 ಹೈಟೆಕ್ ಫೈಟರ್ ಜೆಟ್ಗಳು.
ಇದು ವಿಶ್ವದ ಅತಿ ದೂರದಿಂದ ನೆಲದಿಂದ-ಗಾಳಿಯಲ್ಲಿ ನಡೆದ ದಾಳಿ (ground-to-air kill) ಎಂದು ಅವರು ಉಲ್ಲೇಖಿಸಿದರು.
“ಪಹಲ್ಗಾಮ್ ಭಯೋತ್ಪಾದಕರಿಗೆ ನೆಮ್ಮದಿ ನೀಡಲಿಲ್ಲ”
ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್ ಭಯೋತ್ಪಾದಕ ದಾಳಿಗೆ ಪ್ರತೀಕಾರವಾಗಿ ಭಾರತವು ಮೇ 7 ರಂದು ಆಪರೇಷನ್ ಸಿಂಧೂರ ಅನ್ನು ಪ್ರಾರಂಭಿಸಿತು. ಪಹಲ್ಗಾಮ್ ಭಯೋತ್ಪಾದಕ ದಾಳಿಯಲ್ಲಿ 26 ನಾಗರಿಕರು ಸಾವಿಗೀಡಾಗಿದ್ದರು.
ಪಹಲ್ಗಾಮ್ ದಾಳಿ ನಡೆಸಿದ ಮೂವರು ಭಯೋತ್ಪಾದಕರನ್ನು ಜೂನ್ನಲ್ಲಿ ಹತ್ಯೆ ಮಾಡಿದ ಬಗ್ಗೆ ಪ್ರಸ್ತಾಪಿಸಿದ ಲೆಫ್ಟಿನೆಂಟ್ ಜನರಲ್ ಘಾಯಿ, ಅವರನ್ನು “ಪಾತಾಳದವರೆಗೂ ಬೆನ್ನತ್ತಲು” ಸೇನೆ ನಿರ್ಧರಿಸಿತ್ತು ಮತ್ತು ಅದನ್ನು ಸಾಧಿಸಲಾಯಿತು ಎಂದರು. “ನಮಗೆ 96 ದಿನಗಳು ಬೇಕಾಯಿತು, ಆದರೆ ಅವರಿಗೆ ನೆಮ್ಮದಿಯಿಂದ ಇರಲು ನಾವು ಬಿಡಲಿಲ್ಲ,” ಎಂದು ಅವರು ತಿಳಿಸಿದರು. “ಕೆಲವೊಮ್ಮೆ ಇಂತಹ ವಿಷಯಗಳು ಸುಲಭವಾಗಿ ಕಾಣಿಸುವುದಿಲ್ಲ, ಒಣಹುಲ್ಲಿನ ರಾಶಿಯಲ್ಲಿ ಸೂಜಿಯನ್ನು ಹುಡುಕಿದಂತಾಗಬಹುದು. ಹೀಗಾಗಿ ಇಂತಹ ಕಾರ್ಯಾಚರಣೆಗಳಿಗೆ ಸಮಯ ಬೇಕಾಗುತ್ತದೆ,” ಎಂದು ಹೇಳಿದರು.
