ಲಕ್ನೋ : ತೀರ ವಿಚಿತ್ರ ಮತ್ತು ಆತಂಕಕಾರಿ ಪ್ರಕರಣವೊಂದು ಉತ್ತರ ಪ್ರದೇಶದ ಸೀತಾಪುರ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ. ಅಲ್ಲಿ ವ್ಯಕ್ತಿಯೊಬ್ಬರು ತನ್ನ ಹೆಂಡತಿಯ ನಡವಳಿಕೆಯ ಬಗ್ಗೆ ಜಿಲ್ಲಾಧಿಕಾರಿಗೆ ಅಸಾಧಾರಣ ದೂರು ನೀಡಿರುವುದು ಈಗ ಭಾರೀ ಚರ್ಚೆಗೆ ಕಾರಣವಾಗಿದೆ. ಮೆರಾಜ್ ಎಂಬ ವ್ಯಕ್ತಿ ತನ್ನ ಹೆಂಡತಿ ನಸೀಮುನ್ ರಾತ್ರಿಯಲ್ಲಿ ಹಾವಾಗಿ ರೂಪಾಂತರಗೊಂಡು ತನ್ನನ್ನು ಕಚ್ಚುತ್ತಾಳೆ ಎಂದು ಜಿಲ್ಲಾಧಿಕಾರಿಗೆ ಸಲ್ಲಿಸಿದ ಅರ್ಜಿಯಲ್ಲಿ ಆರೋಪಿಸಿದ್ದಾರೆ.
ಜಿಲ್ಲಾಧಿಕಾರಿ ಅಭಿಷೇಕ ಆನಂದ ಅಧ್ಯಕ್ಷತೆಯಲ್ಲಿ ನಡೆದ ‘ಸಂಪೂರ್ಣ ಸಮಾಧಾನ ದಿವಸ್’ (ಸಂಪೂರ್ಣ ಪರಿಹಾರ ದಿನ) ಕಾರ್ಯಕ್ರಮದ ಸಂದರ್ಭದಲ್ಲಿ ಈ ವ್ಯಕ್ತಿ ಪತ್ನಿಯಿಂದ ತನಗೆ ರಕ್ಷಣೆ ನೀಡುವಂತೆ ಅರ್ಜಿ ಸಲ್ಲಿಸಿದ್ದಾರೆ…!
ಜಿಲ್ಲಾಧಿಕಾರಿಗಳು ಈ ವ್ಯಕ್ತಿಯ ಆರೋಪಗಳನ್ನು ಗಮನಿಸಿ ಈ ವಿಷಯದ ಬಗ್ಗೆ ತನಿಖೆಗೆ ಆದೇಶಿಸಿದ್ದಾರೆ. ಈ ಪ್ರಕರಣವನ್ನು ಉಪವಿಭಾಗೀಯ ಮ್ಯಾಜಿಸ್ಟ್ರೇಟ್ ಮತ್ತು ಸ್ಥಳೀಯ ಪೊಲೀಸರಿಗೆ ದೂರು ದಾಖಲಿಸಿ ಪರಿಶೀಲನೆ ನಡೆಸುವಂತೆ ಸೂಚಿಸಿದ್ದಾರೆ. ಪೊಲೀಸರು ಈ ಘಟನೆಯನ್ನು “ಮಾನಸಿಕ ಕಿರುಕುಳದ ಸಂಭಾವ್ಯ ಪ್ರಕರಣ”ವೆಂದು ಪರಿಗಣಿಸಿ, ಕ್ರಮ ಕೈಗೊಳ್ಳಲು ಪ್ರಾರಂಭಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಮೆರಾಜ್ ತನ್ನ ಅರ್ಜಿಯಲ್ಲಿ, , “ಸರ್, ದಯವಿಟ್ಟು ನನ್ನ ಹೆಂಡತಿಯಿಂದ ನನ್ನನ್ನು ರಕ್ಷಿಸಿ. ರಾತ್ರಿಯಲ್ಲಿ, ಅವಳು ಹಾವಿನಂತೆ ಬದಲಾಗುತ್ತಾಳೆ ಮತ್ತು ನನ್ನುನ್ನು ಕಚ್ಚಲು ಬರುತ್ತಾಳೆ” ಎಂದು ಹೇಳಿದ್ದಾರೆ. ನನ್ನ ಪತ್ನಿ ನಸೀಮುನ್ ರಾತ್ರಿಯಲ್ಲಿ ಹಾವಿನಂತೆ ಶಬ್ದ ಮಾಡುತ್ತ ತನ್ನನ್ನು ಕಚ್ಚಲು ಪ್ರಯತ್ನಿಸುತ್ತಾ ಗೊಂದಲದ ನಡವಳಿಕೆಯನ್ನು ಪ್ರದರ್ಶಿಸುತ್ತಾಳೆ ಎಂದು ಅವರು ದೂರು ಅರ್ಜಿಯಲ್ಲಿ ಆರೋಪಿಸಿದ್ದಾರೆ.
ಜಿಲ್ಲಾ ಮ್ಯಾಜಿಸ್ಟ್ರೇಟ್ ಈ ಆರೋಪಗಳನ್ನು ಗಮನಿಸಿದರು ಮತ್ತು ಈ ವಿಷಯದ ಬಗ್ಗೆ ತನಿಖೆ ನಡೆಸುವಂತೆ ಆದೇಶಿಸಿದರು. ದೂರು ಬಹಿರಂಗವಾದಾಗಿನಿಂದ, ಇದು ವ್ಯಾಪಕ ಗಮನ ಸೆಳೆದಿದೆ ಮತ್ತು ಸ್ಥಳೀಯರಲ್ಲಿ ಅಪನಂಬಿಕೆ ಮತ್ತು ಕುತೂಹಲ ಎರಡಕ್ಕೂ ಕಾರಣವಾಗಿದೆ.
ಆರಂಭದಲ್ಲಿ ಎಲ್ಲವೂ ಚೆನ್ನಾಗಿತ್ತು…ಆದರೆ
ಲೋಧಾಸಾ ಗ್ರಾಮದ ನಿವಾಸಿ ಮೆರಾಜ್, ಅಪರಿಚಿತರ ಬಗ್ಗೆ ಅಲ್ಲ, ತಮ್ಮ ಸ್ವಂತ ಪತ್ನಿ ನಸೀಮುನ್ ಬಗ್ಗೆ ಈಗ ನಿರಂತರ ಭಯದಲ್ಲಿ ಬದುಕುತ್ತಿದ್ದಾರೆ. ದಂಪತಿ ಕೆಲವೇ ತಿಂಗಳುಗಳ ಹಿಂದೆ ವಿವಾಹವಾದರು. ನಸೀಮುನ್ ತಂಗಾವ್ ಪೊಲೀಸ್ ಠಾಣೆ ವ್ಯಾಪ್ತಿಗೆ ಬರುವ ರಾಜಪುರ ಗ್ರಾಮದವರು. ಆರಂಭಿಕ ದಿನಗಳಲ್ಲಿ, ಅವರ ಮದುವೆ ದಾಂಪತ್ಯ ಸರಾಗವಾಗಿ ನಡೆಯುತ್ತಿರುವಂತೆ ತೋರುತ್ತಿತ್ತು. ದಂಪತಿ ಯಾವುದೇ ಸಮಸ್ಯೆಯಿಲ್ಲದೆ ಜೀವನ ನಡೆಸುತ್ತಿದ್ದಾರೆ ಎಂದು ಕುಟುಂಬ ಸದಸ್ಯರು ನಂಬಿದ್ದರು. ಆದಾಗ್ಯೂ, ಮದುವೆಯಾದ ಸ್ವಲ್ಪ ಸಮಯದ ನಂತರ, ತಮ್ಮ ಪತ್ನಿಯ ನಡವಳಿಕೆಯು ತೀವ್ರವಾಗಿ ಅಸ್ಥಿರ ರೀತಿಯಲ್ಲಿ ಬದಲಾಗಲು ಪ್ರಾರಂಭಿಸಿತು ಎಂದು ಮೆರಾಜ್ ಹೇಳಿಕೊಂಡಿದ್ದಾರೆ.
ಸಣ್ಣಪುಟ್ಟ ಚಿಂತೆಗಳಾಗಿ ಪ್ರಾರಂಭವಾದವು ಕ್ರಮೇಣ ಗೊಂದಲದ ಅನುಭವಗಳಾಗಿ ಬೆಳೆದು, ತಮ್ಮ ಸ್ವಂತ ಮನೆಯಲ್ಲಿ ತಮಗೆ ಅಸುರಕ್ಷಿತ ಭಾವನೆ ಮೂಡಿಸಿದೆ ಎಂದು ಅವರು ದೂರಿದ್ದಾರೆ.
ವಿಚಿತ್ರ ಆರೋಪ
ತಮ್ಮ ಪತ್ನಿ ರಾತ್ರಿಯಲ್ಲಿ ವಿಚಿತ್ರ ನಡವಳಿಕೆಯನ್ನು ಪ್ರದರ್ಶಿಸುತ್ತಾಳೆ, ಹಾವಿನಂತೆ ರೂಪಾಂತರಗೊಳ್ಳುತ್ತಾಳೆ, ತನ್ನನ್ನು ಹೆದರಿಸುತ್ತಾಳೆ ಮತ್ತು ತನ್ನನ್ನು ಕಚ್ಚಲು ಪ್ರಯತ್ನಿಸುತ್ತಾಳೆ ಎಂದು ಅವರು ಹೇಳಿಕೊಂಡಿದ್ದಾರೆ. ಅವಳು ಮಾನಸಿಕ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದಾಳೆ ಮತ್ತು ಮಧ್ಯರಾತ್ರಿಯಲ್ಲಿ ತನ್ನನ್ನು ಹೆದರಿಸುವ ಮೂಲಕ ತಮಗೆ ನಿದ್ದೆ ಮಾಡಲು ಕೊಡುವುದಿಲ್ಲ ಎಂದು ಮೆರಾಜ್ ಆರೋಪಿಸಿದ್ದಾರೆ.
ತಮ್ಮ ಅರ್ಜಿಯಲ್ಲಿ ಅವರು, ಎಚ್ಚರವಾಗಿರುವ ಮೂಲಕ ಮಾತ್ರ ತಾನು ತನ್ನನ್ನು ರಕ್ಷಿಸಿಕೊಳ್ಳುತ್ತಿದ್ದೇನೆ, ಏಕೆಂದರೆ ತಾನು ನಿದ್ದೆ ಮಾಡದೆ ಎಚ್ಚರವಾಗಿದ್ದರೆ ಮಾತ್ರ ತನ್ನ ಪತ್ನಿಗೆ “ತನ್ನನ್ನು ಕಚ್ಚಲು ಸಾಧ್ಯವಾಗುವುದಿಲ್ಲ” ಎಂದು ಅವರು ಹೇಳಿದ್ದಾರೆ. ಪ್ರಸ್ತುತ ತನಿಖೆಯಲ್ಲಿರುವ ಈ ಪ್ರಕರಣವು ಅಧಿಕಾರಿಗಳು ಮತ್ತು ಸ್ಥಳೀಯರನ್ನು ದಿಗ್ಭ್ರಮೆಗೊಳಿಸಿದೆ.
ಸಹಾಯಕ್ಕಾಗಿ ಭೂತೋಚ್ಚಾಟಕ ಮತ್ತು ಪಂಚಾಯತಕ್ಕೆ ಮೊರೆ
ಗಮನಾರ್ಹವಾಗಿ, ತನಗೆ ಎದುರಾದ ಪರಿಸ್ಥಿತಿಯನ್ನು ನಿಭಾಯಿಸುವ ಪ್ರಯತ್ನದಲ್ಲಿ ಮೆರಾಜ್ ಭೂತೋಚ್ಚಾಟನೆ ಮಾಡುವ ವ್ಯಕ್ತಿಯ ಸಹಾಯವನ್ನು ಸಹ ಕೋರಿದ್ದಾರೆ ಎಂದು ವರದಿಯಾಗಿದೆ. ಮಹ್ಮದಾಬಾದ್ ಪೊಲೀಸ್ ಠಾಣೆಯಲ್ಲಿ ಗ್ರಾಮ ಪಂಚಾಯತ ಸಭೆ ಕೂಡ ನಡೆದಿತ್ತು, ಆದರೆ ಯಾರಿಗೂ ಒಂದು ನಿರ್ಣಯಕ್ಕೆ ಬರಲು ಸಾಧ್ಯವಾಗಲಿಲ್ಲ. ಹೀಗಾಗಿ ಅಲ್ಲಿಯೂ ಅವರಿಗೆ ಯಾವುದೇ ಪರಿಹಾರ ಸಿಗಲಿಲ್ಲ. ಅವರ ಪತ್ನಿ ನಸೀಮುನ್ ಈಗ ತಮ್ಮ ಪೋಷಕರ ಮನೆಯಲ್ಲಿ ವಾಸಿಸುತ್ತಿದ್ದಾರೆ.
ಮೆರಾಜ್ ಅವರ ಈ ಹೇಳಿಕೆಗಳು ಸಮುದಾಯವನ್ನು ಬೆಚ್ಚಿ ಬೀಳಿಸಿದ್ದು, ಮೆರಾಜ್ ಅವರ ಪತ್ನಿ “ಹಾವಾಗಿ ರೂಪಾಂತರಗೊಳ್ಳುತ್ತಾರೆ” ಎಂಬ ಹೇಳಿಕೆಯು ಆ ಪ್ರದೇಶದಲ್ಲಿ ವ್ಯಾಪಕ ಚರ್ಚೆಯ ವಿಷಯವಾಗಿದೆ.
