ಬೆಳಗಾವಿ : ಖಾನಾಪುರ ಬಳಿಯ ಬಾಚೋಲಿ ಕ್ರಾಸ್ ಸಮೀಪದ ಜತ್ತ-ಜಾಂಬೋಟಿ ರಾಜ್ಯ ಹೆದ್ದಾರಿಯಲ್ಲಿ ಗುರುವಾರ ನಡೆದ ಭೀಕರ ಅಪಘಾತದಲ್ಲಿ ರಸ್ತೆ ಬಳಿಯ ಸೇತುವೆಗೆ ಕಾರು ಡಿಕ್ಕಿ ಹೊಡೆದು
ನಂತರ ಮಗುಚಿ ಚಾಲಕ ಸೇರಿ ಇಬ್ಬರು ಮೃತಪಟ್ಟಿದ್ದು, ಇನ್ನಿಬ್ಬರು ಗಂಭೀರ ಗಾಯಗೊಂಡ ಘಟನೆ ನಡೆದಿದೆ.
ಬೆಳಗಾವಿ ತಾಲೂಕು ಮಚ್ಚೆ ಗ್ರಾಮದ ಕಾರು ಚಾಲಕ ಶಂಕರ ಅಲಿಯಾಸ್ ಮಿಥುನ್ ಮೋಹನ್ ಗೊಮನಾಚೆ( 25), ಸ್ನೇಹಿತ ಖಾನಾಪುರದ ಹತ್ತರವಾಡ ಮುಳವಾಡ ನಿವಾಸಿ, ಹಾಲಿ ಮಚ್ಛೆ ಗ್ರಾಮದ ಆಶಿಶ್ ಮೋಹನ ಪಾಟೀಲ( 26) ಮೃತಪಟ್ಟಿದ್ದಾರೆ. ಮಚ್ಚೆ ಗ್ರಾಮದ ನಿಖೇಶ್ ಜಯವಂತ್ ಪವಾರ( 25)ಮತ್ತು ಜ್ಯೋತಿಬಾ ಗೋವಿಂದ ಗಾಂವಕರ (29)ಗಂಭೀರವಾಗಿ ಗಾಯಗೊಂಡಿದ್ದಾರೆ.
ಸ್ನೇಹಿತರಾಗಿರುವ ಇವರು ಖಾನಾಪುರಕ್ಕೆ ಪಾರ್ಟಿ ಮಾಡಲು ಹೋಗಿದ್ದರು. ಪಾರ್ಟಿ ಮುಗಿಸಿ ಜಾಂಬೋಟಿ ಮಾರ್ಗವಾಗಿ ಬೆಳಗಾವಿಗೆ ವಾಪಸ್ ಆಗುವಾಗ ಕಾರು ಚಾಲಕನ ನಿಯಂತ್ರಣ ತಪ್ಪಿ ಮಗುಚಿದೆ. ಇಳಿಜಾರಿನ ರಸ್ತೆಯಲ್ಲಿ ಕಾರು ಅತಿ ವೇಗದಲ್ಲಿ ರಸ್ತೆ ಸಮೀಪದ ಸೇತುವೆಗೆ ಡಿಕ್ಕಿ ಹೊಡೆದಿದೆ. ಕಾರು ಸಂಪೂರ್ಣ ನುಜ್ಜುಗುಜ್ಜಾಗಿದ್ದು ಖಾನಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
