ಶಿಮ್ಲಾ: ಇತ್ತೀಚೆಗೆ ಹಿಮಾಚಲ ಪ್ರದೇಶದ ಹಟ್ಟಿ ಬುಡಕಟ್ಟು ಸಂಪ್ರದಾಯದ ಮದುವೆಯೊಂದು ಸುದ್ದಿಯಲ್ಲಿದೆ. ಹಿಮಾಚಲ ಪ್ರದೇಶದ ಶಿಲೈ ಗ್ರಾಮದಲ್ಲಿ ಬುಡಕಟ್ಟು ಜನಾಂಗದ ಇಬ್ಬರು ಸಹೋದರರು ಒಬ್ಬರೇ ಮಹಿಳೆಯನ್ನು ವಿವಾಹವಾಗಿದ್ದಾರೆ…!
ಈ ವಿವಾಹಕ್ಕೆ ನೂರಾರು ಜನರು ಸಾಕ್ಷಿಯಾಗಿದ್ದಾರೆ.
ವಧು ಸುನೀತಾ ಚೌಹಾಣ ಮತ್ತು ವರರಾದ ಪ್ರದೀಪ ಮತ್ತು ಕಪಿಲ್ ನೇಗಿ ಯಾವುದೇ ಒತ್ತಡವಿಲ್ಲದೆ ಈ ನಿರ್ಧಾರವನ್ನು ತೆಗೆದುಕೊಂಡಿರುವುದಾಗಿ ಹೇಳಿದ್ದಾರೆ.
ಜುಲೈ 12 ರಂದು ಸಿರ್ಮೌರ್ ಜಿಲ್ಲೆಯ ಟ್ರಾನ್ಸ್-ಗಿರಿ ಪ್ರದೇಶದಲ್ಲಿ ಮೂರು ದಿನಗಳ ಕಾಲ ನಡೆದ ಸಮಾರಂಭಕ್ಕೆ ಸ್ಥಳೀಯ ಜಾನಪದ ಹಾಡುಗಳು ಮತ್ತು ನೃತ್ಯಗಳು ಮೆರುಗು ನೀಡಿದ್ದವು. ವಿವಾಹ ಸಮಾರಂಭದ ವೀಡಿಯೊಗಳು ಅಂತರ್ಜಾಲದಲ್ಲಿ ವೈರಲ್ ಆಗಿವೆ.
ಹಿಮಾಚಲ ಪ್ರದೇಶದ ಕಂದಾಯ ಕಾನೂನುಗಳು ಈ ಬಹುಪತಿತ್ವದ ಸಂಪ್ರದಾಯವನ್ನು ಗುರುತಿಸಿ ಅದಕ್ಕೆ “ಜೋಡಿದಾರ” ಎಂದು ಹೆಸರಿಸಿವೆ. ಟ್ರಾನ್ಸ್-ಗಿರಿಯ ಬಧಾನಾ ಗ್ರಾಮದಲ್ಲಿ, ಕಳೆದ ಆರು ವರ್ಷಗಳಲ್ಲಿ ಅಂತಹ ಐದು ವಿವಾಹಗಳು ನಡೆದಿವೆಯಂತೆ.
ಕುನ್ಹಾತ್ ಗ್ರಾಮದ ವಧು ಸುನೀತಾ ಅವರು, ಈ ಸಂಪ್ರದಾಯದ ಬಗ್ಗೆ ತನಗೆ ತಿಳಿದಿದೆ ಮತ್ತು ಯಾವುದೇ ಒತ್ತಡವಿಲ್ಲದೆ ತಾನು ಈ ನಿರ್ಧಾರವನ್ನು ತೆಗೆದುಕೊಂಡಿದ್ದೇನೆ ಮತ್ತು ಅವರು ರೂಪಿಸಿಕೊಂಡ ಬಂಧವನ್ನು ಗೌರವಿಸುತ್ತೇನೆ ಎಂದು ಹೇಳಿದ್ದಾರೆ. ಶಿಲೈ ಗ್ರಾಮದ ಪ್ರದೀಪ ಸರ್ಕಾರಿ ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದರೆ, ಅವರ ಕಿರಿಯ ಸಹೋದರ ಕಪಿಲ ವಿದೇಶದಲ್ಲಿ ಉದ್ಯೋಗದಲ್ಲಿದ್ದಾರೆ..
“ನಾವು ಈ ಸಂಪ್ರದಾಯವನ್ನು ಸಾರ್ವಜನಿಕವಾಗಿ ಅನುಸರಿಸಿದ್ದೇವೆ ಏಕೆಂದರೆ ನಮಗೆ ಹೆಮ್ಮೆಯಿದೆ ಮತ್ತು ಇದು ಜಂಟಿ ನಿರ್ಧಾರವಾಗಿತ್ತು” ಎಂದು ಪ್ರದೀಪ ಹೇಳಿದ್ದಾರೆ.
ಸಂಪೂರ್ಣ ಪರಸ್ಪರ ಒಪ್ಪಿಗೆ ಮತ್ತು ಸಮುದಾಯದ ಭಾಗವಹಿಸುವಿಕೆಯೊಂದಿಗೆ ನಡೆದ ಈ ಕಾರ್ಯಕ್ರಮವು ಬಹುಪತಿತ್ವದ ಅಪರೂಪದ ಬಹಿರಂಗವಾಗಿ ಸಂಭ್ರಮಾಚರಣೆ ಮಾಡಿ ಆದ ಮದುವೆಯಾಗಿದೆ. ಇಬ್ಬರು ಸಹೋದರರು ಪತ್ನಿಯನ್ನು ಹಂಚಿಕೊಳ್ಳುವ ಪ್ರಾಚೀನ ಆಚರಣೆ ಇದು.
ಹಟ್ಟಿ ಹಿಮಾಚಲ ಪ್ರದೇಶ-ಉತ್ತರಾಖಂಡ ಗಡಿಯಲ್ಲಿರುವ ಒಂದು ನಿಕಟ ಸಮುದಾಯವಾಗಿದ್ದು, ಮೂರು ವರ್ಷಗಳ ಹಿಂದೆ ಇದನ್ನು ಪರಿಶಿಷ್ಟ ಪಂಗಡ ಎಂದು ಘೋಷಿಸಲಾಯಿತು. ಈ ಬುಡಕಟ್ಟು ಜನಾಂಗದಲ್ಲಿ, ಬಹುಪತಿತ್ವವು ಶತಮಾನಗಳಿಂದ ಪ್ರಚಲಿತದಲ್ಲಿತ್ತು, ಆದರೆ ಮಹಿಳೆಯರಲ್ಲಿ ಹೆಚ್ಚುತ್ತಿರುವ ಸಾಕ್ಷರತೆ ಮತ್ತು ಈ ಪ್ರದೇಶದ ಸಮುದಾಯಗಳ ಆರ್ಥಿಕ ಸುಧಾರಣೆಯಿಂದಾಗಿ, ಬಹುಪತಿತ್ವದ ಪ್ರಕರಣಗಳು ವರದಿಯಾಗಿಲ್ಲ.
ಅಂತಹ ವಿವಾಹಗಳನ್ನು ರಹಸ್ಯವಾಗಿ ನಡೆಸಲಾಗುತ್ತಿದೆ ಮತ್ತು ಸಮಾಜವು ಇದನ್ನು ಸ್ವೀಕರಿಸುತ್ತದೆ. ಆದರೆ ಪ್ರಕರಣಗಳು ಕಡಿಮೆ ಎಂದು ಗ್ರಾಮದ ಹಿರಿಯರು ಹೇಳಿದರು.
ತಜ್ಞರ ಪ್ರಕಾರ, ಪೂರ್ವಜರ ಆಸ್ತಿಯಲ್ಲಿ ಬುಡಕಟ್ಟು ಮಹಿಳೆಯರ ಪಾಲು ಇನ್ನೂ ಮುಖ್ಯ ಸಮಸ್ಯೆಯಾಗಿದೆ ಆದರೆ ಪೂರ್ವಜರ ಭೂಮಿಯನ್ನು ವಿಭಜಿಸದಂತೆ ನೋಡಿಕೊಳ್ಳುವುದು ಸಂಪ್ರದಾಯದ ಹಿಂದಿನ ಪ್ರಮುಖ ಪರಿಗಣನೆಗಳಲ್ಲಿ ಒಂದಾಗಿದೆ.
ಸಿರ್ಮೌರ್ ಜಿಲ್ಲೆಯ ಟ್ರಾನ್ಸ್ ಗಿರಿ ಪ್ರದೇಶದ ಸುಮಾರು 450 ಹಳ್ಳಿಗಳಲ್ಲಿ ಹಟ್ಟಿ ಸಮುದಾಯದ ಸುಮಾರು ಮೂರು ಲಕ್ಷ ಜನರು ವಾಸಿಸುತ್ತಿದ್ದಾರೆ ಮತ್ತು ಕೆಲವು ಹಳ್ಳಿಗಳಲ್ಲಿ ಬಹುಪತ್ನಿತ್ವವು ಇನ್ನೂ ರೂಢಿಯಲ್ಲಿದೆ. ಉತ್ತರಾಖಂಡದ ಬುಡಕಟ್ಟು ಪ್ರದೇಶವಾದ ಜೌನ್ಸರ್ ಬಾಬರ್ ಮತ್ತು ಹಿಮಾಚಲ ಪ್ರದೇಶದ ಬುಡಕಟ್ಟು ಜಿಲ್ಲೆ ಕಿನ್ನೌರ್‌ನಲ್ಲಿಯೂ ಇದು ಮೊದಲು ಪ್ರಚಲಿತವಾಗಿತ್ತು.
ಹಟ್ಟಿ ಸಮುದಾಯದ ಪ್ರಧಾನ ಸಂಸ್ಥೆಯಾದ ಕೇಂದ್ರೀಯ ಹಟ್ಟಿ ಸಮಿತಿಯ ಪ್ರಧಾನ ಕಾರ್ಯದರ್ಶಿ ಕುಂದನ್ ಸಿಂಗ್ ಶಾಸ್ತ್ರಿ, ಕುಟುಂಬದ ಕೃಷಿ ಭೂಮಿಯನ್ನು ಮತ್ತಷ್ಟು ವಿಭಜನೆಯಿಂದ ರಕ್ಷಿಸಲು ಈ ಸಂಪ್ರದಾಯವನ್ನು ಸಾವಿರಾರು ವರ್ಷಗಳ ಹಿಂದೆ ಅನುಸರಿಸಲಾಯಿತು ಎಂದು ಹೇಳಿದರು. ಇನ್ನೊಂದು ಕಾರಣವೆಂದರೆ, ವಿಭಿನ್ನ ತಾಯಂದಿರಿಂದ ಜನಿಸಿದ ಇಬ್ಬರು ಅಥವಾ ಹೆಚ್ಚಿನ ಸಹೋದರರನ್ನು ಒಂದೇ ವಧುವಿನೊಂದಿಗೆ ಮದುವೆಯಾಗುವ ಮೂಲಕ ಜಂಟಿ ಕುಟುಂಬದಲ್ಲಿ ಸಹೋದರತ್ವ ಮತ್ತು ಪರಸ್ಪರ ತಿಳುವಳಿಕೆಯನ್ನು ಉತ್ತೇಜಿಸುವುದು ಎಂದು ಅವರು ತಿಳಿಸಿದ್ದಾರೆ.
ಮೂರನೆಯ ಕಾರಣವೆಂದರೆ “ನಿಮಗೆ ದೊಡ್ಡ ಕುಟುಂಬವಿದ್ದರೆ, ಹೆಚ್ಚು ಪುರುಷರು ಇದ್ದರೆ, ಬುಡಕಟ್ಟು ಸಮಾಜದಲ್ಲಿ ನೀವು ಹೆಚ್ಚು ಸುರಕ್ಷಿತವಾಗಿರುತ್ತೀರಿ” ಎಂಬ ಭದ್ರತೆಯ ಭಾವನೆ ಇದರ ಹಿಂದಿದೆ ಎಂದು ಅವರು ಹೇಳಿದರು.
ಬುಡಕಟ್ಟು ಕುಟುಂಬಗಳ ಈ ಅವಶ್ಯಕತೆಗಳು ಸಾವಿರಾರು ವರ್ಷಗಳಿಂದ ಬಹುಪತಿತ್ವ ವ್ಯವಸ್ಥೆಯನ್ನು ಉಳಿಸಿಕೊಂಡಿವೆ, ಆದರೂ ಈ ಸಂಪ್ರದಾಯಗಳು ನಿಧಾನವಾಗಿ ಸಾಯುತ್ತಿವೆ ಎಂದು ಅವರು ಹೇಳಿದರು.
