ಕ್ರಿಕೆಟ್ ದಂತಕತೆ ಸರ್ ಗ್ಯಾರಿ ಸೋಬರ್ಸ್ ನಿಧನ

ಬಾರ್ಬಡೋಸ್: ವಿಶ್ವ ಕ್ರಿಕೆಟ್ ಇತಿಹಾಸದ ಸಾರ್ವಕಾಲಿಕ ಶ್ರೇಷ್ಠ ಆಟಗಾರರಲ್ಲಿ ಒಬ್ಬರೆಂದು ಪರಿಗಣಿಸಲ್ಪಡುವ ವೆಸ್ಟ್ ಇಂಡೀಸ್‌ನ ದಂತಕಥೆ, ಸರ್ ಗಾರ್ಫೀಲ್ಡ್ ಸೋಬರ್ಸ್ ಅವರು 89ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ತಮ್ಮ 90ನೇ ಜನ್ಮದಿನಕ್ಕೆ ಇನ್ನೆರಡು ವಾರಗಳು ಬಾಕಿ ಇರುವಾಗ ಬಾರ್ಬಡೋಸ್‌ನಲ್ಲಿರುವ ತಮ್ಮ ನಿವಾಸದಲ್ಲಿ ಅವರು ಕೊನೆಯುಸಿರೆಳೆದರು.
ಅವರು ಪುತ್ರರಾದ ಡೇನಿಯಲ್ ಮತ್ತು ಮ್ಯಾಥ್ಯೂ ಹಾಗೂ ದತ್ತು ಪುತ್ರಿ ಜಿನೀವೀವ್ ಅವರನ್ನು ಅಗಲಿದ್ದಾರೆ. 1954ರಿಂದ 1974ರವರೆಗೆ ವೆಸ್ಟ್ ಇಂಡೀಸ್ ತಂಡವನ್ನು ಪ್ರತಿನಿಧಿಸಿದ ಸೋಬರ್ಸ್, 93 ಟೆಸ್ಟ್ ಪಂದ್ಯಗಳನ್ನು ಆಡಿದ್ದು, ಬ್ಯಾಟಿಂಗ್, ಬೌಲಿಂಗ್ ಮತ್ತು ಫೀಲ್ಡಿಂಗ್ – ಈ ಮೂರೂ ವಿಭಾಗಗಳಲ್ಲಿ ತಮ್ಮ ಅಸಾಧಾರಣ ಪ್ರದರ್ಶನದ ಮೂಲಕ ಕ್ರಿಕೆಟ್ ಲೋಕದಲ್ಲಿ ಅಳಿಸಲಾಗದ ಛಾಪು ಮೂಡಿಸಿದ್ದರು.
ತಮ್ಮ ಕಾಲಕ್ಕಿಂತ ಬಹಳ ಮುಂದಿದ್ದ ಆಟಗಾರರೆಂದು ಗುರುತಿಸಲ್ಪಟ್ಟ ಸೋಬರ್ಸ್, ಆಕ್ರಮಣಕಾರಿ ಬ್ಯಾಟಿಂಗ್ ಶೈಲಿಗೆ ಹೆಸರಾಗಿದ್ದರು. . ಅವರು 93 ಟೆಸ್ಟ್ ಪಂದ್ಯಗಳಲ್ಲಿ 57.78ರ ಅತ್ಯುತ್ತಮ ಸರಾಸರಿಯಲ್ಲಿ 8,032 ರನ್‌ಗಳನ್ನು ಕಲೆಹಾಕಿದ್ದು, 26 ಶತಕಗಳು ಮತ್ತು 30 ಅರ್ಧಶತಕಗಳನ್ನು ದಾಖಲಿಸಿದ್ದಾರೆ. ಅಲ್ಲದೆ, ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಒಂದೇ ಓವರ್‌ನಲ್ಲಿ ಸತತ ಆರು ಸಿಕ್ಸರ್‌ಗಳನ್ನು ಸಿಡಿಸಿದ ಮೊದಲ ಆಟಗಾರ ಎಂಬ ಐತಿಹಾಸಿಕ ಸಾಧನೆಯೂ ಅವರ ಹೆಸರಿನಲ್ಲಿದೆ.

ಸೋಬರ್ಸ್‌ ಅವರು  ಎಡಗೈ ವೇಗ-ಮಧ್ಯಮ ಬೌಲಿಂಗ್‌ನಿಂದ ಹಿಡಿದು ಆಫ್‌ಸ್ಪಿನ್ ಹಾಗೂ ರಿಸ್ಟ್‌ಸ್ಪಿನ್‌ವರೆಗೂ ವಿವಿಧ ರೀತಿಯ ಬೌಲಿಂಗ್ ಮಾಡುವ ಅಪರೂಪದ ಸಾಮರ್ಥ್ಯ ಹೊಂದಿದ್ದರು.
1958ರಲ್ಲಿ ಪಾಕಿಸ್ತಾನದ ವಿರುದ್ಧ ಅವರು ಗಳಿಸಿದ ಅಜೇಯ 365 ರನ್‌ಗಳು ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ವೈಯಕ್ತಿಕ ಸ್ಕೋರ್ ಎಂಬ ವಿಶ್ವದಾಖಲೆಯಾಗಿ 36 ವರ್ಷಗಳ ಕಾಲ ಉಳಿದಿತ್ತು.
ಬೌಲರ್ ಆಗಿಯೂ ಸೋಬರ್ಸ್ ಅಪೂರ್ವ ಸಾಧನೆ ಮಾಡಿದ್ದಾರೆ. ಪಿಚ್‌ಗೆ ಅನುಗುಣವಾಗಿ ತಮ್ಮ ಬೌಲಿಂಗ್ ಶೈಲಿಯನ್ನು ಬದಲಾಯಿಸಬಲ್ಲ ವಿಶಿಷ್ಟ ಸಾಮರ್ಥ್ಯ ಹೊಂದಿದ್ದ ಅವರು, ಟೆಸ್ಟ್ ಕ್ರಿಕೆಟ್‌ನಲ್ಲಿ 34.03ರ ಸರಾಸರಿಯಲ್ಲಿ 235 ವಿಕೆಟ್‌ಗಳನ್ನು ಪಡೆದಿದ್ದರು. ಅದಷ್ಟೇ ಅಲ್ಲದೆ, ಅದ್ಭುತ ಫೀಲ್ಡರ್ ಆಗಿದ್ದ ಅವರು 109 ಕ್ಯಾಚ್‌ಗಳನ್ನು ಪಡೆದು ತಂಡಕ್ಕೆ ಅಮೂಲ್ಯ ಕೊಡುಗೆ ನೀಡಿದ್ದರು.
1975ರಲ್ಲಿ ಬ್ರಿಟಿಷ್ ಸರ್ಕಾರದಿಂದ ‘ನೈಟ್‌ಹುಡ್’ ಗೌರವಕ್ಕೆ ಪಾತ್ರರಾದ ಸೋಬರ್ಸ್, ವೆಸ್ಟ್ ಇಂಡೀಸ್ ತಂಡವನ್ನು 39 ಟೆಸ್ಟ್ ಪಂದ್ಯಗಳಲ್ಲಿ ನಾಯಕರಾಗಿ ಮುನ್ನಡೆಸಿದ್ದರು.

2004ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ಐಸಿಸಿ) ತನ್ನ ವರ್ಷದ ಶ್ರೇಷ್ಠ ಕ್ರಿಕೆಟಿಗ ಪ್ರಶಸ್ತಿಗೆ ಹೆಸರಿಡುವ ಉದ್ದೇಶದಿಂದ ಸುನಿಲ ಗವಾಸ್ಕರ್, ರಿಚಿ ಬೆನೋಡ್ ಮತ್ತು ಮೈಕೆಲ್ ಹೋಲ್ಡಿಂಗ್ ಅವರನ್ನು ಒಳಗೊಂಡ ಸಮಿತಿಯನ್ನು ರಚಿಸಿತ್ತು. ಕ್ರಿಕೆಟ್‌ನ ಅತ್ಯುನ್ನತ ವೈಯಕ್ತಿಕ ಪ್ರಶಸ್ತಿಗೆ ಗೌರವ ಸಲ್ಲಿಸಲು ಈ ಸಮಿತಿ ಸರ್ ಗಾರ್ಫೀಲ್ಡ್ ಸೋಬರ್ಸ್ ಅವರನ್ನು ಆಯ್ಕೆ ಮಾಡಿದ್ದು, ಅದರ ಫಲವಾಗಿ ‘ಸರ್ ಗಾರ್ಫೀಲ್ಡ್ ಸೋಬರ್ಸ್ ಟ್ರೋಫಿ’ ಅಸ್ತಿತ್ವಕ್ಕೆ ಬಂದಿತು.
ಸೋಬರ್ಸ್ ಅವರ ನಿಧನದೊಂದಿಗೆ ವಿಶ್ವ ಕ್ರಿಕೆಟ್ ತನ್ನ ಶ್ರೇಷ್ಠ ಆಲ್‌ರೌಂಡರ್‌ಗಳಲ್ಲಿ ಒಬ್ಬರನ್ನು ಕಳೆದುಕೊಂಡಿದ್ದು, ಅವರ ಸಾಧನೆಗಳು ಮತ್ತು ಪರಂಪರೆ ಮುಂದಿನ ಹಲವು ಪೀಳಿಗೆಗಳಿಗೆ ಸ್ಫೂರ್ತಿಯಾಗಿ ಉಳಿಯಲಿವೆ.