ಸೈಲೆನ್ಸರ್ ಹಾಕಿ ಸೌಂಡ್ ಮಾಡುತ್ತಿದ್ದ ಪುಂಡರನ್ನು ಸೈಲೆಂಟ್ ಮಾಡಿದ ಬೆಳಗಾವಿ ಟ್ರಾಫಿಕ್ ಪೊಲೀಸರು..!
ನಾಳೆಯಿಂದ ನಂಬರ ಪ್ಲೇಟ್ ಹಾಕದವರೇ ಟಾರ್ಗೆಟ್..!
ಬೆಳಗಾವಿ : ಬೈಕ್ ಗಳಿಗೆ ಡಿಪೆಕ್ಟಿವ್‌ ಸೈಲೆನ್ಸರ ಅಳವಡಿಸಿಕೊಂಡು ವಾಹನ ಚಾಲನೆ ಮಾಡಿ ಸಾರ್ವಜನಿಕರಿಗೆ ಕಿರಿಕಿರಿ ಮಾಡುತ್ತಿದ್ದ ದ್ವಿಚಕ್ರ ವಾಹನ ಸವಾರರ ಮೇಲೆ ಬೆಳಗಾವಿ ಸಂಚಾರ ಮತ್ತು ಕ್ರೈಂ ಡಿಸಿಪಿ ಸ್ನೇಹಾ ಪಿ ವಿ ಅವರು ದಕ್ಷಿಣ ಸಂಚಾರ ಪೊಲೀಸ್ ಠಾಣೆಯ ಪಿಐ ವಿನಾಯಕ ಬಡಿಗೇರ ಹಾಗೂ ಪಿಎಸ್ಐ ಲಕ್ಷ್ಮಣ ಕರಿಗೌಡರ ಅವರ ನೇತೃತ್ವದಲ್ಲಿ ಠಾಣೆಯ ವ್ಯಾಪ್ತಿಯಲ್ಲಿನ ಪ್ರದೇಶಗಳಲ್ಲಿ ವಿಶೇಷ ಕಾರ್ಯಾಚರಣೆ ಕೈಗೊಂಡು ಸುಮಾರು 16 ದ್ವಿಚಕ್ರ ವಾಹನ ಸವಾರರ ವಾಹನಗಳನ್ನು ವಶಕ್ಕೆ ಪಡೆದು ಅವರ ಮೇಲೆ ಕಾನೂನಿನ ಕ್ರಮ ಕೈಗೊಂಡಿದ್ದಾರೆ.
ಈ ಹಿಂದೆ ಉತ್ತರ ಮತ್ತು ದಕ್ಷಿಣ ಸಂಚಾರ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ಕಾರ್ಯಾಚರಣೆ ನಡೆಸಿ ಸೈಲೆನ್ಸರ್ ಸೌಂಡ್ ಮಾಡುತ್ತಿದ್ದ ಪುಂಡರ ಮೇಲೆ ಕ್ರಮ ಕೈಗೊಂಡಿದ್ದರು. ಈಗ ಮತ್ತೆ ಬಾಲ ಬಿಚ್ಚುತ್ತಿರುವ ಅಂತಹ ಬೈಕ್ ಪುಂಡ ಸವಾರರಿಗೆ ಕಾನೂನಿನ ಮೂಲಕ ಬುದ್ದಿ ಕಲಿಸಲು ಮಂದಾಗಿದ್ದಾರೆ.
ಅಷ್ಟೇ ಅಲ್ಲದೇ, ನಾಳೆಯಿಂದ ಸಂಚಾರ ನಿಯಮಗಳನ್ನು ಉಲ್ಲಂಘಿಸುವವರು, ಬೈಕ್ ಗಳಿಗೆ ನಂಬರ ಪ್ಲೇಟ್ ಅಳವಡಿಸದೆ ಇರುವವರ ಮೇಲೆ ಕಠಿಣ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಡಿಸಿಪಿ ಸ್ನೇಹಾ ತಿಳಿಸಿದ್ದಾರೆ.
