ಬೆಳಗಾವಿ : ಕಾಕತಿ ಪೊಲೀಸ್ ಠಾಣೆಯ ಕುದ್ರೆಮನಿ ಗ್ರಾಮದಲ್ಲಿ ಕ್ಷುಲ್ಲಕ ಕಾರಣಕ್ಕೆ ಪತಿರಾಯ ಪತ್ನಿ ಮೇಲೆ ಹಲ್ಲೆ ನಡೆಸಿರುವ ಘಟನೆ ಶುಕ್ರವಾರ ನಡೆದಿದೆ. ಸಂಬಂಧಿಕರ ಮನೆಯಲ್ಲಿ ಮಟನ್ ಊಟ ಮಾಡಿದ್ದರು. ಈ ಕಾರಣಕ್ಕೆ ಮಕ್ಕಳು ಶಾಲೆಗೆ ಹೋಗಿರಲಿಲ್ಲ. ಇದರಿಂದ ಪತಿ ಏಕನಾಥ ಮಹದೇವ ಕಾಂಬಳೆ ಮತ್ತು ಅವನ ಸಹೋದರಿಯರು ಪ್ರಮೀಳಾ ಕಾಂಬಳೆ ಅವರ ಮೇಲೆ ಹಲ್ಲೆ ಮಾಡಿದ್ದು ಈಗ ಪ್ರಮೀಳಾ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ದಾಖಲಾಗಿದ್ದಾರೆ. ಎಂಟು ವರ್ಷಗಳ ಹಿಂದೆ ಏಕನಾಥ-ಪ್ರಮೀಳಾ ಮದುವೆ ನಡೆದಿತ್ತು. ಆದರೆ ಮನೆಯಲ್ಲಿ ಕ್ಷುಲ್ಲಕ ಕಾರಣಕ್ಕೆ ಏಕನಾಥ-ಅವನ ಸಹೋದರಿಯರು ಹಲ್ಲೆ ಮಾಡುತ್ತಿದ್ದು ಗ್ರಾಮದ ಹಿರಿಯರು ಮಾತುಕತೆ ಮೂಲಕ ರಾಜಿ ನಡೆಸಿದ್ದರು. ಈಗ ಮತ್ತೆ ಪ್ರಮೀಳಾ ಮೇಲೆ ಹಲ್ಲೆ ಎಸಗಿರುವ ಬಗ್ಗೆ ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ವಿವರಿಸಲಾಗಿದೆ. ಕಾಕತಿ ಪೊಲೀಸರು ಪ್ರಕರಣ ದಾಖಲು ಮಾಡಿಕೊಂಡು ತನಿಖೆ ನಡೆಸುತ್ತಿದ್ದಾರೆ.
