ದಿಢೀರನೆ ಬಂದು ನಾಯಿ ಮರಿ ಹೊತ್ತೊಯ್ದು ಮರ ಏರಿ ಕುಳಿತ ದೈತ್ಯ ಮಂಗ…! ಮುಂದೇನಾಯ್ತು ಗೊತ್ತೆ…?

ಪ್ರಕೃತಿಯಲ್ಲಿ ಪ್ರಾಣಿಗಳ ನಡುವಿನ ಪ್ರೀತಿ ಮತ್ತು ವಾತ್ಸಲ್ಯಕ್ಕೆ ಕೊನೆಯಿಲ್ಲ ಎಂಬುದಕ್ಕೆ ಸಾಕ್ಷಿಯಾದ ಅಪರೂಪದ ಘಟನೆಯೊಂದು ಹಿಮಾಚಲ ಪ್ರದೇಶದ ಮಂಡಿ ಜಿಲ್ಲೆಯಲ್ಲಿ ನಡೆದಿದ್ದು, ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ. ಇಲ್ಲಿನ ರೇವಾಲ್ಸರ್ ಪ್ರದೇಶದಲ್ಲಿ ಕೋತಿಯೊಂದು ನಾಯಿ ಮರಿಯನ್ನು ಹೊತ್ತೊಯ್ದು ಮರದ ಮೇಲೆ ಕುಳಿತು ಪ್ರೀತಿಯಿಂದ ನೋಡಿಕೊಂಡ ದೃಶ್ಯ ಸ್ಥಳೀಯರ ಮನಗೆದ್ದಿದೆ.
ಸ್ಥಳೀಯರು ನೀಡಿದ ಮಾಹಿತಿ ಪ್ರಕಾರ, ರಸ್ತೆ ಬದಿಯಲ್ಲಿದ್ದ ಸಣ್ಣ ಸಾಕು ನಾಯಿ ಮರಿಯೊಂದನ್ನು (ಸ್ಟ್ರೇ ಪಪ್ಪಿ) ಕೋತಿ ದಿಢೀರನೆ ಕೈಯಲ್ಲಿ ಎತ್ತಿಕೊಂಡಿದೆ. ಅಷ್ಟಕ್ಕೇ ನಿಲ್ಲದೆ, ಆ ಮರಿಯೊಂದಿಗೆ ಸುಮಾರು 20 ಅಡಿ ಎತ್ತರದ ಮರವನ್ನು ಏರಿದೆ. ಇದನ್ನು ನೋಡಿದ ತಕ್ಷಣ ಸ್ಥಳೀಯರು ತೀವ್ರ ಆತಂಕಗೊಂಡರು. ಅಷ್ಟೊಂದು ಎತ್ತರದಿಂದ ಕೋತಿ ಎಲ್ಲಿ ನಾಯಿ ಮರಿಯನ್ನು ಕೆಳಗೆ ಹಾಕಿಬಿಡುತ್ತದೆಯೋ ಎಂದು ಭಯಗೊಂಡ ಜನರು, ಮರದ ಸುತ್ತಲೂ ಜಮಾಯಿಸಿದರು.

ತಾಯಿಯಂತೆ  ಮಡಿಲಲ್ಲಿಟ್ಟುಕೊಂಡ ಮಂಗ…
ಆದರೆ, ಸ್ಥಳೀಯರ ಭಯವನ್ನು ಸುಳ್ಳು ಮಾಡಿದ ಕೋತಿ, ನಾಯಿ ಮರಿಗೆ ಯಾವುದೇ ಹಾನಿ ಮಾಡಲಿಲ್ಲ. ಬದಲಿಗೆ, ತನ್ನದೇ ಸ್ವಂತ ಮರಿಯನ್ನು ಜಾಗರೂಕತೆಯಿಂದ ನೋಡಿಕೊಳ್ಳುವಂತೆ, ಆ ನಾಯಿ ಮರಿಯನ್ನು ಎದೆಗೆ ಅಪ್ಪಿ ಮುದ್ದಾಡಿದೆ. ಅಲ್ಲದೆ ಅದರ ಮೈಯನ್ನು ಸವರಿ ಸಮಾಧಾನಪಡಿಸಿದೆ. ಸುಮಾರು 15 ನಿಮಿಷಗಳ ಕಾಲ ಮರದ ಮೇಲೆಯೇ ಕುಳಿತು ನಾಯಿ ಮರಿಯನ್ನು ಅತ್ಯಂತ ಪ್ರೀತಿಯಿಂದ ಕಂಡಿದೆ.
ಸುರಕ್ಷಿತವಾಗಿ ಕೆಳಗಿಳಿದ ಮರಿ
ಮರದ ಮೇಲೆ ಒಂದಿಷ್ಟು ಸಮಯ ಕಳೆದ ನಂತರ, ಕೋತಿ ತಾನಾಗಿಯೇ ಮೆಲ್ಲನೆ ಕೆಳಗಿಳಿದು ಬಂದು ನಾಯಿ ಮರಿಗೆ ಯಾವುದೇ ತೊಂದರೆ ಮಾಡದೆ ಸುರಕ್ಷಿತವಾಗಿ ನೆಲದ ಮೇಲೆ ಬಿಟ್ಟು ಹೋಗಿದೆ. ಇದರಿಂದಾಗಿ ನೆರೆದಿದ್ದ ಸಾರ್ವಜನಿಕರು ನಿಟ್ಟುಸಿರು ಬಿಟ್ಟಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್:
ಈ ಅಪರೂಪದ ದೃಶ್ಯದ ವಿಡಿಯೋ ಸದ್ಯ ಇಂಟರ್ನೆಟ್‌ನಲ್ಲಿ ಸಖತ್ ವೈರಲ್‌ ಆಗುತ್ತಿದ್ದು, ಇದನ್ನು ಪ್ರಾಣಿ ಸಂಕುಲದ ನಡುವಿನ ಅಪರೂಪದ “ಪ್ರೀತಿ” ಎಂದು ಬಣ್ಣಿಸುತ್ತಿದ್ದಾರೆ. ಸ್ಥಳೀಯರ ಪ್ರಕಾರ, ಆ ಕೋತಿ ಹೆಣ್ಣಾಗಿರಬಹುದು ಮತ್ತು ಅದಕ್ಕಾಗಿಯೇ ಅದರಲ್ಲಿ ಇಂತಹ ತಾಯ್ತನದ ಭಾವನೆ ಮೂಡಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಒಂದೆಡೆ ಈ ಘಟನೆ ಜನರ ಮನ ಮುಟ್ಟಿದ್ದರೆ, ಮತ್ತೊಂದೆಡೆ ಇದು ಸ್ಥಳೀಯರಲ್ಲಿ ಹೊಸದೊಂದು ಚರ್ಚೆ ಮತ್ತು ಆತಂಕಕ್ಕೆ ಕಾರಣವಾಗಿದೆ. ಕೋತಿಗಳು ಇದೇ ರೀತಿ ಸಣ್ಣ ಸಣ್ಣ ಮಕ್ಕಳನ್ನೂ ಎತ್ತಿಕೊಂಡು ಹೋದರೆ ಎಂಬ ಪ್ರಶ್ನೆ ಸಾರ್ವಜನಿಕರನ್ನು ಕಾಡತೊಡಗಿದೆ. ಈ ಘಟನೆಯ ನಂತರ ಸುತ್ತಮುತ್ತಲಿನ ಪೋಷಕರಲ್ಲಿ ತಮ್ಮ ಮಕ್ಕಳ ಸುರಕ್ಷತೆಯ ಬಗ್ಗೆ ಸಣ್ಣದೊಂದು ಆತಂಕ ಮನೆಮಾಡಿದೆ.
ಆದರೆ ಆದಾಗ್ಯೂ, ಪರಿಸರ ತಜ್ಞರು ಇದಕ್ಕೆ ಯಾವುದೇ ಆತಂಕಪಡುವ ಅಗತ್ಯವಿಲ್ಲ ಎಂದು ಹೇಳಿದ್ದಾರೆ. ಇಂತಹ ಘಟನೆಗಳು ಅಸಾಮಾನ್ಯವಲ್ಲ ಮತ್ತು ರೆವಾಲ್ಸರ್ ಘಟನೆಯನ್ನು ಆತಂಕದ ಕಾರಣವೆಂದು ನೋಡಬಾರದು ಎಂದು ಅವರು ಹೇಳಿದ್ದಾರೆ. ಅವರ ಪ್ರಕಾರ, ಮಂಗಗಳು ಸಾಂದರ್ಭಿಕವಾಗಿ ಇತರ ಪ್ರಾಣಿಗಳ ಮರಿಗಳ ಬಗ್ಗೆ ಇಂತಹ ಸಹಾನುಭೂತಿಯ ನಡವಳಿಕೆಯನ್ನು ಪ್ರದರ್ಶಿಸುತ್ತವೆ ಎಂದು ಹೇಳುತ್ತಾರೆ.