ಶ್ರೀ ವಿಜಯಪುರಂ: ಭಾರತದ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಸಮೂಹವು ಶನಿವಾರದಂದು ಜಾಗತಿಕ ಮಟ್ಟದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ. ಸ್ವರಾಜ್ ದ್ವೀಪದ (ಹ್ಯಾವ್ಲಾಕ್ ಐಲೆಂಡ್) ವಿಶ್ವಪ್ರಸಿದ್ಧ ರಾಧಾನಗರ ಬೀಚ್ನಲ್ಲಿ ವಿಶ್ವದ ಅತಿದೊಡ್ಡ ‘ಅಂಡರ್ ವಾಟರ್’ (ನೀರೊಳಗಿನ) ರಾಷ್ಟ್ರಧ್ವಜವನ್ನು ಅನಾವರಣಗೊಳಿಸುವ ಮೂಲಕ ಗಿನ್ನೆಸ್ ವಿಶ್ವ ದಾಖಲೆ ನಿರ್ಮಿಸಿದೆ.
ಸಮುದ್ರದಾಳದಲ್ಲಿ ಅನಾವರಣಗೊಂಡ ಈ ಬೃಹತ್ ತ್ರಿವರ್ಣ ಧ್ವಜವು ಸುಮಾರು 60 x 40 ಮೀಟರ್ ವಿಸ್ತೀರ್ಣವನ್ನು ಹೊಂದಿದೆ. ಅಂಡಮಾನ್ ಮತ್ತು ನಿಕೋಬಾರ್ ಪೊಲೀಸ್, ಅರಣ್ಯ ಇಲಾಖೆ, ಭಾರತೀಯ ನೌಕಾಪಡೆ, ಕೋಸ್ಟ್ ಗಾರ್ಡ್ ಮತ್ತು ವಿವಿಧ ಡೈವಿಂಗ್ ಕೇಂದ್ರಗಳ ಪರಿಣಿತ ಸ್ಕೂಬಾ ಡೈವರ್ಗಳು ಈ ಸಂಕೀರ್ಣ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.
ಶನಿವಾರ (ಮೇ 2) ಬೆಳಿಗ್ಗೆ 10:35ಕ್ಕೆ ಗಿನ್ನೆಸ್ ವಿಶ್ವ ದಾಖಲೆಯ ತೀರ್ಪುಗಾರರಾದ ರಿಷಿ ನಾಥ್ ಅವರು ಈ ಸಾಧನೆಯನ್ನು ಅಧಿಕೃತವಾಗಿ ದೃಢೀಕರಿಸಿ, ಲೆಫ್ಟಿನೆಂಟ್ ಗವರ್ನರ್ ಡಿ.ಕೆ. ಜೋಶಿ ಅವರಿಗೆ ಪ್ರಮಾಣಪತ್ರವನ್ನು ಹಸ್ತಾಂತರಿಸಿದರು.
ಈ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾದ 200ಕ್ಕೂ ಹೆಚ್ಚು ಡೈವರ್ಗಳಲ್ಲಿ ಮೂವರು ಶಾಲಾ ವಿದ್ಯಾರ್ಥಿಗಳಾದ ಗುರುಗ್ರಾಮದ ಶ್ರೀರಾಮ ಶಾಲೆಯ 12ನೇ ತರಗತಿ ವಿದ್ಯಾರ್ಥಿಯಾದ ಫತೇಹ್ ಜಹಾನ್ ಸಿಂಗ್ (16), ಬೆಂಗಳೂರಿನ ರಿಷಿ ವ್ಯಾಲಿ ಶಾಲೆಯ 11ನೇ ತರಗತಿ ವಿದ್ಯಾರ್ಥಿನಿ ಲಾವಣ್ಯ ಐರಾ (15) ಹಾಗೂ ನವದೆಹಲಿಯ ಸರ್ದಾರ್ ಪಟೇಲ್ ವಿದ್ಯಾಲಯದ 10ನೇ ತರಗತಿ ವಿದ್ಯಾರ್ಥಿ ರಣವಿಜಯ ಸಿಂಗ್ (14) ಅವರು ವಿಶೇಷ ಗಮನ ಸೆಳೆದರು. ಈ ವಿದ್ಯಾರ್ಥಿಗಳು ಮಾತನಾಡಿ, “ಸಮುದ್ರದಾಳದಲ್ಲಿ ರಾಷ್ಟ್ರಧ್ವಜವನ್ನು ಹಿಡಿಯುವುದು ಅತ್ಯಂತ ಭಾವುಕ ಮತ್ತು ಹೆಮ್ಮೆಯ ಕ್ಷಣವಾಗಿತ್ತು” ಎಂದು ಸಂಭ್ರಮ ಹಂಚಿಕೊಂಡರು.
ದ್ವೀಪದ ಹಿರಿಮೆ ಹೆಚ್ಚಿಸಿದ ಸಾಧನೆ:
ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದ ಲೆಫ್ಟಿನೆಂಟ್ ಗವರ್ನರ್ ಡಿ.ಕೆ. ಜೋಶಿ, ಮುಖ್ಯ ಕಾರ್ಯದರ್ಶಿ ಚಂದ್ರ ಭೂಷಣಕುಮಾರ ಮತ್ತು ಡಿಜಿಪಿ ಎಚ್.ಎಸ್. ಧಲಿವಾಲ್ ತಂಡದ ಸಮನ್ವಯತೆಯನ್ನು ಶ್ಲಾಘಿಸಿದರು. ಈ ಸಾಧನೆಯು ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳನ್ನು ಸಾಹಸ ಪ್ರವಾಸೋದ್ಯಮ ಮತ್ತು ಜಾಗತಿಕ ಮಟ್ಟದ ಸಾಗರ ಚಟುವಟಿಕೆಗಳ ಕೇಂದ್ರವಾಗಿ ಗುರುತಿಸುವಂತೆ ಮಾಡಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಅಂಡಮಾನ್ ಆಡಳಿತವು ಭಾನುವಾರ ಮತ್ತೊಂದು ಗಿನ್ನೆಸ್ ದಾಖಲೆಗೆ ಸಜ್ಜಾಗಿದೆ. ಸ್ವರಾಜ್ ದ್ವೀಪದ ‘ಲೈಟ್ಹೌಸ್ ಡೈವ್ ಸೈಟ್’ನಲ್ಲಿ ‘ಅತಿ ಎತ್ತರದ ಹ್ಯೂಮನ್ ಸ್ಟಾಕ್’ (Tallest Human Stack) ನಿರ್ಮಿಸುವ ಪ್ರಯತ್ನ ನಡೆಯಲಿದೆ.
