ದೇವೇಂದ್ರ ಹೆಸರಿಗೆ ಇಂದೇ ಕೊನೆಗೂ ಅಂಕಿತ ?

ಮುಂಬಯಿ: ಮಹಾರಾಷ್ಟ್ರದ ಮಹಾಯುತಿ ಮೈತ್ರಿಕೂಟದ ಶಾಸಕಾಂಗ ಪಕ್ಷದ ನಾಯಕನ ಆಯ್ಕೆ ಸೋಮವಾರ (ಡಿಸೆಂಬರ್‌ 2) ನಡೆಯಲಿದ್ದು, ಸರಕಾರ ರಚನೆ ಗೊಂದಲಗಳಿಗೆ ತೆರೆ ಬೀಳಲಿದೆ.ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದ ಹಂಗಾಮಿ ಮುಖ್ಯಮಂತ್ರಿ ಮತ್ತು ಶಿವಸೇನೆ ನಾಯಕ ಏಕನಾಥ ಶಿಂಧೆ, ''ಬಿಜೆಪಿ ಸೂಚಿಸಿದ ವ್ಯಕ್ತಿ ಮೈತ್ರಿಕೂಟದ ಶಾಸಕಾಂಗ ಪಕ್ಷದ ನಾಯಕನಾಗಿ ಆಯ್ಕೆಯಾಗಲಿದ್ದಾರೆ. ನೂತನ ಮುಖ್ಯಮಂತ್ರಿ ಆಯ್ಕೆ ವಿಚಾರವಾಗಿ ಬಿಜೆಪಿ ತೆಗೆದುಕೊಳ್ಳುವ ಯಾವುದೇ ನಿರ್ಧಾರಕ್ಕೆ ನನ್ನ ಸಹಮತವಿದೆ.

ಸಿಎಂ ಸ್ಥಾನದ ವಿಚಾರವಾಗಿ ಮೈತ್ರಿಯಲ್ಲಿ ಯಾವುದೇ ಭಿನ್ನಮತ ಇಲ್ಲ,'' ಎಂದು ಸ್ಪಷ್ಟಪಡಿಸಿದರು.
ಸತಾರಾ ಜಿಲ್ಲೆಯ ಸ್ವಗ್ರಾಮ ಡಾರೆಯಲ್ಲಿ ಭಾನುವಾರ ಸುದ್ದಿಗಾರರ ಜತೆ ಮಾತನಾಡಿದ ಶಿಂಧೆ, ''ಹೊಸ ಸರಕಾರ ರಚನೆ ಪ್ರಸ್ತಾಪಗಳು ನಡೆಯುತ್ತಿವೆ. ಮೂರು ಪಕ್ಷಗಳು ಒಗ್ಗಟ್ಟಾಗಿ ಹೊಸ ಸರಕಾರ, ಮಂತ್ರಿ ಮಂಡಲ ರಚನೆ ಮಾಡಲಿವೆ,'' ಎಂದು ಶಿಂಧೆ ಹೇಳಿದರು. ಯಾವುದೇ ಅಸಮಾಧಾನವಿಲ್ಲ. ಮುಖ್ಯಮಂತ್ರಿ ವಿಷಯವಾಗಿ ಶಿಂಧೆ ಅಸಮಾಧಾನಗೊಂಡಿದ್ದಾರೆ. ಅಧಿಕಾರ ಹಂಚಿಕೆಗೆ ಒತ್ತಡ ತಂತ್ರ ಅನುಸರಿಸುತ್ತಾರೆ ಎಂಬ ಮಾತು ಅಲ್ಲಗಳೆದ ಏಕನಾಥ್‌ ಶಿಂಧೆ, ''ನಮ್ಮ ಊರಿಗೆ ಆಗಾಗ್ಗೆ ಭೇಟಿ ನೀಡುತ್ತಿರುವೆ.
ಇದರಲ್ಲಿ ವಿಶೇಷವೇನಿಲ್ಲ. ಸಿಎಂ ಆಯ್ಕೆ ವಿಷಯದಲ್ಲಿ ನನ್ನ ನಿಲುವು ಸ್ಪಷ್ಟಪಡಿಸಿದ ಬಳಿಕವೂ ಗೊಂದಲ ಸೃಷ್ಟಿಸುವುದು ಏಕೆ,'' ಎಂದು ಪ್ರಶ್ನಿಸಿದರು.''ಸೋಮವಾರ ಬಿಜೆಪಿ ಶಾಸಕಾಂಗ ಪಕ್ಷದ ನಾಯಕನ ಆಯ್ಕೆ ನಡೆಯಲಿದೆ. ಬಳಿಕ ಮಹಾಯುತಿ ನಾಯಕನನ್ನು ಮೂರು ಪಕ್ಷಗಳ ಶಾಸಕರು ಆಯ್ಕೆ ಮಾಡುವರು. ಒಗ್ಗೂಡಿ ಸರಕಾರ ರಚನೆಗೆ ಹಕ್ಕು ಮಂಡಿಸಲಾಗುವುದು. ಮಹಾಯುತಿಗೆ ಚಾರಿತ್ರಿಕ ಜನಾದೇಶ ನೀಡಿರುವ ಜನರ ಆಶೋತ್ತರ ಈಡೇರಿಸಲು ಮೈತ್ರಿಕೂಟ ಕೆಲಸ ಮಾಡಲಿದೆ,'' ಎಂದು ಶಿಂಧೆ ಹೇಳಿದರು.

ಶಿಂಧೆ ಬಣದ ಡಿಸಿಎಂ ಯಾರು?
ನೂತನ ಸರಕಾರದಲ್ಲಿ ಶಿಂಧೆ ಬಣದಿಂದ ಡಿಸಿಎಂ ಹುದ್ದೆಗೆ ಯಾರು ಎಂಬ ಪ್ರಶ್ನೆಗೆ ಇನ್ನೂ ಉತ್ತರ ಸಿಕ್ಕಿಲ್ಲ.
ಉನ್ನತ ಮೂಲಗಳ ಪ್ರಕಾರ ಏಕನಾಥ್‌ ಶಿಂಧೆ ಪುತ್ರ ಶ್ರೀಕಾಂತ್‌ ಶಿಂಧೆ ಹೆಸರು ಕೇಳಿ ಬಂದಿದೆ.''ಪುತ್ರನನ್ನು ಡಿಸಿಎಂ ಮಾಡುವ ವಿಯಷವಾಗಿ ಇನ್ನೂ ಅಂತಿಮ ನಿರ್ಧಾರ ಕೈಗೊಂಡಿಲ್ಲ. ಮೈತ್ರಿ ನಾಯಕರ ಜತೆ ನಡೆಯುವ ಸಭೆಯಲ್ಲಿ ತೀರ್ಮಾನಿಸಲಾಗುವುದು. ಯಾರಿಗೆ ಯಾವ ಸ್ಥಾನ ಕೊಡಬೇಕು, ಯಾವ ಪಕ್ಷಕ್ಕೆ ಎಷ್ಟು ಮಂತ್ರಿ ಸ್ಥಾನ ನೀಡಬೇಕು ಎಂಬುದು ಮೈತ್ರಿ ಸಭೆಯಲ್ಲಿ ನಿರ್ಧಾರವಾಗಲಿದೆ,'' ಎಂದು ಶಿಂಧೆ ಹೇಳಿದ್ದಾರೆ. ರಾಜ್ಯದಲ್ಲಿ ಅರಾಜಕತೆಚುನಾವಣೆ ಫಲಿತಾಂಶ ಪ್ರಕಟವಾಗಿ ಒಂದು ವಾರ ಕಳೆದರೂ ಮುಖ್ಯಮಂತ್ರಿ ಅಯ್ಕೆ ಮಾಡಲು ಅಸಮರ್ಥವಾಗಿರುವ ಮಹಾಯುತಿ ಮೈತ್ರಿ, ಮತದಾರರು ನೀಡಿದ ಜನಾದೇಶಕ್ಕೆ ಅವಮಾನ ಮಾಡಿದೆ ಎಂದು ಪ್ರತಿಪಕ್ಷಗಳು ಟೀಕಿಸಿವೆ.
"ಸರಕಾರ ರಚನೆಗೆ ಹಕ್ಕು ಮಂಡಿಸುವ ಮುನ್ನವೇ ಪ್ರಮಾಣ ವಚನ ಕಾರ್ಯಕ್ರಮದ ದಿನಾಂಕ ನಿಗದಿ ಮಾಡಿರುವ ಮೈತ್ರಿ ನಾಯಕರ ನಿರ್ಧಾರ ರಾಜ್ಯದಲ್ಲಿ ಅರಾಜಕ ಆಡಳಿತದ ಸಂಕತೇವಾಗಿದೆ,'' ಎಂದು ವಾಗ್ದಾಳಿ ನಡೆಸಿರುವ ಶಿವಸೇನೆ (ಉದ್ಧವ್‌ ಬಣ) ಶಾಸಕ ಆದಿತ್ಯಾ ಠಾಕ್ರೆ, ''ಒಂದು ವೇಳೆ ಮಹಾವಿಕಾಸ್‌ ಅಘಾಡಿ ಬಹುಮತ ಪಡೆದು, ಸರಕಾರ ರಚನೆಗೆ ವಿಳಂಬ ಮಾಡಿದ್ದಲ್ಲಿ ಇಷ್ಟೊತ್ತಿಗೆ ರಾಷ್ಟ್ರಪತಿ ಆಡಳಿತ ಜಾರಿಯಾಗಿರುತ್ತಿತ್ತು,'' ಎಂದು ಹೇಳಿದ್ದಾರೆ.