ನವದೆಹಲಿ : ಭಾರತೀಯ ಜನತಾ ಪಕ್ಷದ (ಬಿಜೆಪಿ) ರಾಷ್ಟ್ರೀಯ ಅಧ್ಯಕ್ಷ ನಿತಿನ್ ನಬೀನ್ ಅವರು ಸೋಮವಾರ ಪಕ್ಷದ ನೂತನ ರಾಷ್ಟ್ರೀಯ ಪದಾಧಿಕಾರಿಗಳ ತಂಡವನ್ನು ಪ್ರಕಟಿಸಿದ್ದಾರೆ. ಮಾಜಿ ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಹಾಗೂ ರಾಷ್ಟ್ರೀಯ ಸ್ವಯಂಸೇವಕ ಸಂಘದ (ಆರ್‌ಎಸ್‌ಎಸ್) ರಾಷ್ಟ್ರೀಯ ಕಾರ್ಯಕಾರಿಣಿ ಸದಸ್ಯ ರಾಮ ಮಾಧವ ಅವರಿಗೆ ಪ್ರಮುಖ ಸಂಘಟನಾ ಜವಾಬ್ದಾರಿಗಳನ್ನು ನೀಡಲಾಗಿದೆ. ನಬೀನ್ ಅವರು ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರಾದ ಬಳಿಕ ಪ್ರಕಟಿಸಿರುವ ಮೊದಲ ಪ್ರಮುಖ ಸಂಘಟನಾ ಪುನರ್ರಚನೆ ಇದಾಗಿದೆ.
ಮಾಜಿ ಕೇಂದ್ರ ಸಚಿವೆ ಸ್ಮೃತಿ ಇರಾನಿ ಅವರನ್ನು ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾಗಿ ನೇಮಿಸಲಾಗಿದ್ದು, ರಾಮ ಮಾಧವ ಅವರು ರಾಷ್ಟ್ರೀಯ ಉಪಾಧ್ಯಕ್ಷರಾಗಿ ಬಿಜೆಪಿಯ ಪ್ರಮುಖ ಸಂಘಟನಾ ಹೊಣೆಗಾರಿಕೆಗೆ ಮರಳಿದ್ದಾರೆ. ಕೇಂದ್ರ ಸಚಿವ ಪಿಯೂಷ್ ಗೋಯಲ್ ಅವರಿಗೆ ರಾಷ್ಟ್ರೀಯ ಖಜಾಂಚಿ ಜವಾಬ್ದಾರಿ ನೀಡಲಾಗಿದೆ. ತ್ರಿಪುರದ ಮಾಜಿ ಮುಖ್ಯಮಂತ್ರಿ ಬಿಪ್ಲಬಕುಮಾರ ದೇಬ್ ಅವರನ್ನು ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾಗಿ ಹಾಗೂ ಉತ್ತರಾಖಂಡದ ಮಾಜಿ ಮುಖ್ಯಮಂತ್ರಿ ತೀರತ್ ಸಿಂಗ್ ರಾವತ್ ಅವರನ್ನು ರಾಷ್ಟ್ರೀಯ ಉಪಾಧ್ಯಕ್ಷರನ್ನಾಗಿ ನೇಮಿಸಲಾಗಿದೆ.
ನಬೀನ್ ಅವರು ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರಾಗಿ ಜೆ.ಪಿ. ನಡ್ಡಾ ಅವರ ನಂತರ ಅಧಿಕಾರ ವಹಿಸಿಕೊಂಡ ಕೆಲ ತಿಂಗಳ ಬಳಿಕ ಈ ಪುನರ್ರಚನೆ ನಡೆದಿದೆ. 2027ರಲ್ಲಿ ಉತ್ತರ ಪ್ರದೇಶ ಸೇರಿದಂತೆ ಐದು ರಾಜ್ಯಗಳಲ್ಲಿ ನಡೆಯಲಿರುವ ವಿಧಾನಸಭಾ ಚುನಾವಣೆಗಳಿಗೆ ಮುನ್ನ ಪಕ್ಷದ ಸಂಘಟನೆಯನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಹೊಸ ತಂಡವನ್ನು ರೂಪಿಸಲಾಗಿದೆ ಎಂದು ಪಕ್ಷದ ಬೆಳವಣಿಗೆಯನ್ನು ಗಮನಿಸಿದ ವರದಿಗಳು ಸೂಚಿಸಿವೆ.
ಮಹಿಳೆಯರಿಗೆ ಪ್ರಮುಖ ಪ್ರಾತಿನಿಧ್ಯ
ಹೊಸ ತಂಡದಲ್ಲಿ ಮಹಿಳೆಯರಿಗೆ ಗಮನಾರ್ಹ ಪ್ರಾತಿನಿಧ್ಯ ನೀಡಲಾಗಿದೆ. ರಾಷ್ಟ್ರೀಯ ಉಪಾಧ್ಯಕ್ಷರ ಪಟ್ಟಿಯಲ್ಲಿ ಹಲವು ಮಹಿಳಾ ನಾಯಕಿಯರಿಗೆ ಸ್ಥಾನ ನೀಡಲಾಗಿದ್ದು, ರಾಷ್ಟ್ರೀಯ ಕಾರ್ಯದರ್ಶಿಗಳ ಪಟ್ಟಿಯಲ್ಲೂ ಮಹಿಳಾ ಮುಖಗಳಿಗೆ ಅವಕಾಶ ಕಲ್ಪಿಸಲಾಗಿದೆ. ಪಕ್ಷದ ಹೊಸ ತಂಡದಲ್ಲಿ ಒಟ್ಟು 13 ರಾಷ್ಟ್ರೀಯ ಉಪಾಧ್ಯಕ್ಷರು, 8 ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಗಳು ಹಾಗೂ 16 ರಾಷ್ಟ್ರೀಯ ಕಾರ್ಯದರ್ಶಿಗಳು ಇದ್ದಾರೆ.
ಮಾಜಿ ರಾಜಸ್ಥಾನ ಮುಖ್ಯಮಂತ್ರಿ ವಸುಂಧರಾ ರಾಜೇ ಸಿಂಧಿಯಾ, ಬೈಜಯಂತ ಪಾಂಡಾ, ರೇಖಾ ವರ್ಮಾ ಮತ್ತು ತಾರೀಕ್ ಮನ್ಸೂರ್ ಅವರು ತಮ್ಮ ರಾಷ್ಟ್ರೀಯ ಉಪಾಧ್ಯಕ್ಷ ಹುದ್ದೆಗಳನ್ನು ಉಳಿಸಿಕೊಂಡಿದ್ದಾರೆ.
ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಗಳಾಗಿ ವಿನೋದ್ ತಾವ್ಡೆ ಮತ್ತು ಸುನಿಲ್ ಬನ್ಸಲ್ ಮುಂದುವರಿದಿದ್ದಾರೆ. ಬಿ.ಎಲ್. ಸಂತೋಷ ಅವರು ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ (ಸಂಘಟನೆ) ಸ್ಥಾನದಲ್ಲಿ ಮುಂದುವರಿಯಲಿದ್ದಾರೆ. ಅನಿಲ ಆಂಟನಿ ರಾಷ್ಟ್ರೀಯ ಕಾರ್ಯದರ್ಶಿ ಸ್ಥಾನವನ್ನು ಉಳಿಸಿಕೊಂಡಿದ್ದು, ಅನಿಲ ಬಲೂನಿ ಅವರು ಪಕ್ಷದ ಪ್ರಮುಖ ರಾಷ್ಟ್ರೀಯ ಮಾಧ್ಯಮ ಜವಾಬ್ದಾರಿಯಲ್ಲಿ ಮುಂದುವರಿಯಲಿದ್ದಾರೆ.
ಅಮಿತ್ ಮಾಲವಿಯಾಗೆ ಕೊಕ್
ನಬೀನ್ ಅವರ ಹೊಸ ತಂಡದಲ್ಲಿ ಬಿಜೆಪಿಯ ಡಿಜಿಟಲ್ ಹಾಗೂ ಸಾಮಾಜಿಕ ಮಾಧ್ಯಮ ಕಾರ್ಯಾಚರಣೆಯ ಪ್ರಮುಖ ಮುಖವಾಗಿದ್ದ ಅಮಿತ್ ಮಾಲವಿಯಾ ಅವರಿಗೆ ಸ್ಥಾನ ದೊರೆತಿಲ್ಲ. ಅವರ ಬದಲಿಗೆ ದೀಪಕ ಮ್ಹಾಸ್ಕೇ ಅವರನ್ನು ರಾಷ್ಟ್ರೀಯ ಸಾಮಾಜಿಕ ಮಾಧ್ಯಮ ಸಂಚಾಲಕರಾಗಿ ನೇಮಿಸಲಾಗಿದೆ. ಪ್ರೀತಿ ಗಾಂಧಿ, ಶಿವಾನಂದ ದ್ವಿವೇದಿ, ಅಲೋಕ ಭಟ್ ಮತ್ತು ಅರುಣ ಯಾದವ್ ಅವರನ್ನು ಸಹ-ಸಂಚಾಲಕರಾಗಿ ನೇಮಿಸಲಾಗಿದೆ.
ಹೊಸ ತಂಡದ ಘೋಷಣೆಯ ಬಳಿಕ ಮಾಲವಿಯಾ ಅವರು ತಾವು ಪಕ್ಷದ ಸಾಮಾಜಿಕ ಮಾಧ್ಯಮ ಮುಖ್ಯಸ್ಥರ ಸ್ಥಾನದಿಂದ ಹೊರಬಂದಿರುವುದನ್ನು ದೃಢಪಡಿಸಿದ್ದಾರೆ. ಹಾಗೂ ದೀಪಕ್ ಮ್ಹಾಸ್ಕೇ ಮತ್ತು ಸಹ-ಸಂಚಾಲಕರಾಗಿ ನೇಮಕಗೊಂಡಿರುವ ಪ್ರೀತಿ ಗಾಂಧಿ, ಶಿವಾನಂದ ದ್ವಿವೇದಿ, ಅಲೋಕ ಭಟ್ ಹಾಗೂ ಅರುಣ ಯಾದವ್ ಅವರಿಗೆ ಅವರು ಅಭಿನಂದನೆ ಸಲ್ಲಿಸಿದ್ದಾರೆ.
ಕಳೆದ ಒಂದು ದಶಕದಿಂದ ಈ ಐವರೊಂದಿಗೆ ತಾವು ನಿಕಟವಾಗಿ ಕೆಲಸ ಮಾಡಿರುವುದಾಗಿ ಹೇಳಿದ ಮಾಲವಿಯಾ, ಹೊಸ ತಂಡವು ಬಿಜೆಪಿಯ ಡಿಜಿಟಲ್ ಸಂವಹನವನ್ನು ಮತ್ತಷ್ಟು ಹೊಸ ಮೈಲುಗಲ್ಲುಗಳತ್ತ ಕೊಂಡೊಯ್ಯಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.
ತಮ್ಮ 11 ವರ್ಷಗಳ ಜವಾಬ್ದಾರಿಯನ್ನು ನೆನಪಿಸಿಕೊಂಡ ಮಾಲವಿಯಾ, ಬಿಜೆಪಿಯ ಸಾಮಾಜಿಕ ಮಾಧ್ಯಮ ಬೆಂಬಲಿಗರಿಗೆ ಧನ್ಯವಾದ ಅರ್ಪಿಸಿದರು. ಕಷ್ಟ-ಸುಖದ ಎಲ್ಲ ಸಂದರ್ಭಗಳಲ್ಲೂ ಬೆಂಬಲಿಗರು ತಮ್ಮೊಂದಿಗೆ ನಿಂತಿದ್ದು, ಸಾರ್ವಜನಿಕ ಅಭಿಪ್ರಾಯದ ರೂಪಾಂತರದಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದಾರೆ ಎಂದು ಅವರು ಹೇಳಿದರು. ಮುಂದೆಯೂ ಪಕ್ಷ ಹಾಗೂ ತಮ್ಮ ಉತ್ತರಾಧಿಕಾರಿಗಳಿಗೆ ಇದೇ ರೀತಿಯ ಬೆಂಬಲ ನೀಡುವಂತೆ ಮನವಿ ಮಾಡಿದರು.
ಹಲವು ಹಳೆಯ ಮುಖಗಳಿಗೆ ಸ್ಥಾನವಿಲ್ಲ
ಹೊಸ ರಾಷ್ಟ್ರೀಯ ತಂಡದಲ್ಲಿ ಹಿಂದಿನ ತಂಡದ ಹಲವು ಪ್ರಮುಖ ನಾಯಕರಿಗೆ ಸ್ಥಾನ ದೊರೆತಿಲ್ಲ. ಅವರಲ್ಲಿ ದುಶ್ಯಂತ್ ಗೌತಮ, ರಾಧಾ ಮೋಹನ್ ದಾಸ್ ಅಗರ್ವಾಲ್, ಸಂಜಯ ಮಾಯುಖ್, ಸರೋಜ್ ಪಾಂಡೆ, ತೇಜಸ್ವಿ ಸೂರ್ಯ, ಲಕ್ಷ್ಮಿಕಾಂತ ಬಾಜಪೇಯಿ ಮತ್ತು ಅರುಣ ಸಿಂಗ್ ಪ್ರಮುಖರು.ಇದರೊಂದಿಗೆ ಪಕ್ಷದ ಯುವ ಹಾಗೂ ಡಿಜಿಟಲ್ ಸಂಘಟನಾ ವ್ಯವಸ್ಥೆಯಲ್ಲೂ ಬದಲಾವಣೆ ಕಂಡುಬಂದಿದೆ. ತೇಜಸ್ವಿ ಸೂರ್ಯ ಅವರಿಗೆ ಹೊಸ ರಾಷ್ಟ್ರೀಯ ತಂಡದಲ್ಲಿ ಸ್ಥಾನ ಸಿಕ್ಕಿಲ್ಲ.
ಬಿಜೆಪಿಯ ರಾಷ್ಟ್ರೀಯ ಪದಾಧಿಕಾರಿಗಳ ಸಂಪೂರ್ಣ ಪಟ್ಟಿ
ರಾಷ್ಟ್ರೀಯ ಉಪಾಧ್ಯಕ್ಷರು
ವಸುಂಧರಾ ರಾಜೇ ಸಿಂಧಿಯಾ — ರಾಜಸ್ಥಾನ
ತೀರತ್ ಸಿಂಗ್ ರಾವತ್ — ಉತ್ತರಾಖಂಡ
ರಾಮ ಮಾಧವ — ದೆಹಲಿ
ಬೈಜಯಂತ್ ಪಾಂಡಾ — ಒಡಿಶಾ
ಡಿ. ಪುರಂದೇಶ್ವರಿ — ಆಂಧ್ರ ಪ್ರದೇಶ
ರೇಖಾ ವರ್ಮಾ — ಉತ್ತರ ಪ್ರದೇಶ
ವರ್ಷಾಬೆನ್ ನರೇಂದ್ರಭಾಯಿ ದೋಶಿ — ಗುಜರಾತ್
ಭಾರತಿ ಪ್ರವೀಣ ಪವಾರ್ — ಮಹಾರಾಷ್ಟ್ರ
ಮನ್‌ಪ್ರೀತ್ ಸಿಂಗ್ ಬಾದಲ್ — ಪಂಜಾಬ್
ಲಾಲ್ ಸಿಂಗ್ ಆರ್ಯ — ಮಧ್ಯಪ್ರದೇಶ
ಎಂ. ನಾಗರಾಜ — ಕರ್ನಾಟಕ
ತಾರೀಕ್ ಮನ್ಸೂರ್ — ಉತ್ತರ ಪ್ರದೇಶ
ಮಧುಚಂದ್ರ ಕರ್ — ಪಶ್ಚಿಮ ಬಂಗಾಳ
ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ (ಸಂಘಟನೆ)
ಬಿ.ಎಲ್. ಸಂತೋಷ — ದೆಹಲಿ
ರಾಷ್ಟ್ರೀಯ ಜಂಟಿ ಪ್ರಧಾನ ಕಾರ್ಯದರ್ಶಿಗಳು (ಸಂಘಟನೆ)
ಶಿವಪ್ರಕಾಶ — ಮುಂಬೈ
ಸೌದಾನ್ ಸಿಂಗ್ — ಚಂಡೀಗಢ
ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಗಳು
ವಿನೋದ ತಾವ್ಡೆ — ಮಹಾರಾಷ್ಟ್ರ
ಸುನಿಲ ಬನ್ಸಲ್ — ದೆಹಲಿ
ಬಿಪ್ಲಬಕುಮಾರ ದೇಬ್ — ತ್ರಿಪುರ
ಸ್ಮೃತಿ ಇರಾನಿ — ಉತ್ತರ ಪ್ರದೇಶ
ಸತೀಶ ಪೂನಿಯಾ — ರಾಜಸ್ಥಾನ
ಗಜೇಂದ್ರ ಪಟೇಲ್ — ಮಧ್ಯಪ್ರದೇಶ
ಹರೀಶ ದ್ವಿವೇದಿ — ಉತ್ತರ ಪ್ರದೇಶ
ಸಂಜಯ ಭಾಟಿಯಾ — ಹರಿಯಾಣ
ರಾಷ್ಟ್ರೀಯ ಕಾರ್ಯದರ್ಶಿಗಳು
ಕವಿತಾ ಪಾಟಿದಾರ್ — ಮಧ್ಯಪ್ರದೇಶ
ಕೆ. ಸುರೇಂದ್ರನ್ — ಕೇರಳ
ಭೋಲಾ ಸಿಂಗ್ — ಉತ್ತರ ಪ್ರದೇಶ
ಪ್ರದೀಪ ವರ್ಮಾ — ಜಾರ್ಖಂಡ್
ಜಗದೀಶ ಈಶ್ವರಭಾಯಿ ಪಟೇಲ್ — ಗುಜರಾತ್
ಸಂದೀಪ ಪಾಠಕ್ — ದೆಹಲಿ
ಫಾಂಗ್ನೋನ್ ಕೊನ್ಯಾಕ್ — ನಾಗಾಲ್ಯಾಂಡ್
ಸಂಗೀತಾ ಯಾದವ್ — ಉತ್ತರ ಪ್ರದೇಶ
ಅನಿಲ ಆಂಟನಿ — ಕೇರಳ
ಎಂ. ವೆಂಕಟೇಶನ್ — ತಮಿಳುನಾಡು
ಮನೋಜ ಟಿಗಾ — ಪಶ್ಚಿಮ ಬಂಗಾಳ
ಸಿದ್ಧಾರ್ಥ ಶಂಭು — ಬಿಹಾರ
ಸ್ವದೇಶ ಸಿಂಗ್ — ದೆಹಲಿ
ಮೃಗಾಂಕಾ ದೇವು ಬರ್ಮನ್ — ಅಸ್ಸಾಂ
ರೋಹನ್ ಗುಪ್ತಾ — ಗುಜರಾತ್
ಜೈ ಪ್ರಕಾಶ — ದೆಹಲಿ
ರಾಷ್ಟ್ರೀಯ ಖಜಾಂಚಿ
ಪಿಯೂಷ್ ಗೋಯಲ್ — ಮಹಾರಾಷ್ಟ್ರ
ಮೋರ್ಚಾಗಳಿಗೆ ಹೊಸ ಅಧ್ಯಕ್ಷರು
ಬಿಜೆಪಿಯ ವಿವಿಧ ಮೋರ್ಚಾಗಳಿಗೂ ಹೊಸ ಜವಾಬ್ದಾರಿಗಳನ್ನು ಹಂಚಿಕೆ ಮಾಡಲಾಗಿದೆ.
ಭಾರತೀಯ ಜನತಾ ಯುವ ಮೋರ್ಚಾ (BJYM): ಹೇಮಾಂಗ ಜೋಶಿ — ಗುಜರಾತ್
ಬಿಜೆಪಿ ಮಹಿಳಾ ಮೋರ್ಚಾ: ರೂಪ ಕುಮಾರಿ ಚೌಧರಿ — ಛತ್ತೀಸ್‌ಗಢ
ಬಿಜೆಪಿ ಒಬಿಸಿ ಮೋರ್ಚಾ: ಅಮರಪಾಲ ಮೌರ್ಯ — ಉತ್ತರ ಪ್ರದೇಶ
ಬಿಜೆಪಿ ಕಿಸಾನ್ ಮೋರ್ಚಾ: ಬನ್ಸಿಲಾಲ ಗುರ್ಜರ್ — ಮಧ್ಯಪ್ರದೇಶ
ಬಿಜೆಪಿ ಎಸ್‌ಸಿ ಮೋರ್ಚಾ: ಶಿವೇಶಕುಮಾರ ರಾಮ — ಬಿಹಾರ
ಬಿಜೆಪಿ ಎಸ್‌ಟಿ ಮೋರ್ಚಾ: ಮನ್ನಾಲಾಲ ರಾವತ್ — ರಾಜಸ್ಥಾನ
ಬಿಜೆಪಿ ಅಲ್ಪಸಂಖ್ಯಾತ ಮೋರ್ಚಾ: ಕುಂವರ್ ಬಾಸಿತ್ ಅಲಿ — ಉತ್ತರ ಪ್ರದೇಶ
ಕಿಸಾನ್ ಮೋರ್ಚಾದಲ್ಲಿ ವಿಶೇಷ ಬದಲಾವಣೆ ಮಾಡಲಾಗಿದ್ದು, ಉತ್ತರ ಪ್ರದೇಶದ ರಾಜಕುಮಾರ ಚಾಹರ್ ಅವರ ಬದಲಿಗೆ ಮಧ್ಯಪ್ರದೇಶದ ಬನ್ಸೀಲಾಲ್ ಗುರ್ಜರ್ ಅವರನ್ನು ಹೊಸ ಅಧ್ಯಕ್ಷರನ್ನಾಗಿ ನೇಮಿಸಲಾಗಿದೆ.
ಇತರ ಪ್ರಮುಖ ನೇಮಕಾತಿಗಳು
ಶಿವಪ್ರಕಾಶ್ ಮತ್ತು ಸೌದಾನ್ ಸಿಂಗ್ ಅವರನ್ನು ರಾಷ್ಟ್ರೀಯ ಜಂಟಿ ಪ್ರಧಾನ ಕಾರ್ಯದರ್ಶಿಗಳಾಗಿ (ಸಂಘಟನೆ) ನೇಮಿಸಲಾಗಿದೆ. ರಾಷ್ಟ್ರೀಯ ಮಟ್ಟದಲ್ಲಿ ಪಕ್ಷದ ಸಂಘಟನಾ ಕಾರ್ಯವನ್ನು ಬಿ.ಎಲ್. ಸಂತೋಷ ಅವರು ಮುಂದುವರಿಸಲಿದ್ದಾರೆ.
ಮಾಜಿ ಕಾಂಗ್ರೆಸ್ ವಕ್ತಾರರಾಗಿದ್ದ ರೋಹನ್ ಗುಪ್ತಾ ಅವರನ್ನು ಬಿಜೆಪಿ ರಾಷ್ಟ್ರೀಯ ಕಾರ್ಯದರ್ಶಿಯಾಗಿ ನೇಮಿಸಲಾಗಿದೆ. ಅನಿಲ ಆಂಟನಿ ಅವರು ರಾಷ್ಟ್ರೀಯ ಕಾರ್ಯದರ್ಶಿ ಸ್ಥಾನದಲ್ಲಿ ಮುಂದುವರಿದಿದ್ದಾರೆ.
ರಾಜೇಶ ಮಂಗಲ್ ಅವರನ್ನು ರಾಷ್ಟ್ರೀಯ ಜಂಟಿ ಖಜಾಂಚಿಯಾಗಿ ನೇಮಿಸಲಾಗಿದೆ. ಸಂಬಿತ್ ಪಾತ್ರಾ ಅವರಿಗೆ ಈಶಾನ್ಯ ರಾಜ್ಯಗಳ ಸಂಯೋಜಕ ಜವಾಬ್ದಾರಿ ನೀಡಲಾಗಿದ್ದು, ತರುಣ್ ಚುಗ್ ಅವರನ್ನು ಕೇಂದ್ರ ಕಚೇರಿ ಉಸ್ತುವಾರಿಯಾಗಿ ನೇಮಿಸಲಾಗಿದೆ.
ಅನುಭವ ಮತ್ತು ಹೊಸ ಶಕ್ತಿಯ ಸಂಯೋಜನೆ: ನಬೀನ್
ಹೊಸ ಪದಾಧಿಕಾರಿಗಳನ್ನು ಅಭಿನಂದಿಸಿದ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ನಿತಿನ್ ನಬೀನ್, ಅನುಭವ ಮತ್ತು ಹೊಸ ಶಕ್ತಿಯ ಸಂಯೋಜನೆಯಿರುವ ಈ ತಂಡ ಪ್ರಧಾನಿ ನರೇಂದ್ರ ಮೋದಿ ಅವರ ಮಾರ್ಗದರ್ಶನದಲ್ಲಿ ಪಕ್ಷದ ಸಂಘಟನೆಗೆ ಹೊಸ ಚೈತನ್ಯ ನೀಡಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.
ಹೊಸ ಪದಾಧಿಕಾರಿಗಳು ಪಕ್ಷದ ಸಮರ್ಪಿತ ಕಾರ್ಯಕರ್ತರಾಗಿ ಕೆಲಸ ಮಾಡಿ ಬಿಜೆಪಿಯ ಸಂಘಟನೆಯನ್ನು ಮತ್ತಷ್ಟು ಬಲಪಡಿಸುವುದರ ಜೊತೆಗೆ ‘ವಿಕಸಿತ ಭಾರತ’ ನಿರ್ಮಾಣ ಮತ್ತು ರಾಷ್ಟ್ರ ನಿರ್ಮಾಣದ ಪಕ್ಷದ ದೃಷ್ಟಿಕೋನವನ್ನು ಮುಂದಕ್ಕೆ ಕೊಂಡೊಯ್ಯಲಿದ್ದಾರೆ ಎಂದು ನಬೀನ್ ಹೇಳಿದರು.
ಹೊಸ ತಂಡಕ್ಕೆ ಪ್ರಧಾನಿ ಮೋದಿ ಅಭಿನಂದನೆ
ಪ್ರಧಾನಿ ನರೇಂದ್ರ ಮೋದಿ ಕೂಡ ಬಿಜೆಪಿಯ ಹೊಸ ರಾಷ್ಟ್ರೀಯ ತಂಡಕ್ಕೆ ಅಭಿನಂದನೆ ಸಲ್ಲಿಸಿದರು. ಹೊಸ ಪದಾಧಿಕಾರಿಗಳ ಒಟ್ಟಾರೆ ಸಂಘಟನಾ ಅನುಭವ, ಉತ್ಸಾಹ ಹಾಗೂ ತಳಮಟ್ಟದ ಸಂಪರ್ಕವನ್ನು ಮೋದಿ ಶ್ಲಾಘಿಸಿದರು.
ಹೊಸ ತಂಡವು ಪಕ್ಷವನ್ನು ಮತ್ತಷ್ಟು ಬಲಪಡಿಸುವುದರ ಜೊತೆಗೆ ಸಾರ್ವಜನಿಕ ಸೇವೆಯತ್ತ ಗಮನ ಕೇಂದ್ರೀಕರಿಸಲಿದೆ ಎಂಬ ವಿಶ್ವಾಸವನ್ನು ಪ್ರಧಾನಿ ವ್ಯಕ್ತಪಡಿಸಿದರು.
ಒಟ್ಟಾರೆ, ನಿತಿನ್ ನಬೀನ್ ನೇತೃತ್ವದ ಹೊಸ ತಂಡದಲ್ಲಿ ಹಿರಿಯ ಅನುಭವಿಗಳ ಜೊತೆಗೆ ಹೊಸ ಮುಖಗಳಿಗೆ ಅವಕಾಶ, ಮಹಿಳೆಯರು ಹಾಗೂ ವಿವಿಧ ಸಾಮಾಜಿಕ-ಪ್ರಾದೇಶಿಕ ಸಮುದಾಯಗಳಿಗೆ ಪ್ರಾತಿನಿಧ್ಯ, ಡಿಜಿಟಲ್ ಸಂಘಟನೆಯಲ್ಲಿ ಬದಲಾವಣೆ ಮತ್ತು ಮುಂಬರುವ ವಿಧಾನಸಭಾ ಚುನಾವಣೆಗಳನ್ನು ಗಮನದಲ್ಲಿಟ್ಟುಕೊಂಡ ಸಂಘಟನಾ ಪುನರ್‌ವ್ಯವಸ್ಥೆಯ ಸ್ಪಷ್ಟ ಚಿತ್ರಣ ಕಂಡುಬಂದಿದೆ.
